Lara Lois impúxose con claridade ás súas rivais na IV XCM Audi Selection Plus – Concello de Piñor. A proba supuña o retorno da competición nesta disciplina despois de case tres meses de paréntese. O XCM regresa con forza con dous desafíos en dúas fins de semana consecutivas que constitúen o reto final da Copa Galicia de BTT Maratón.
Como primeiro asalto desa dobre cita exerceu este domingo o IV XCM Audi Selection Plus – Concello de Piñor. A proba ourensá de 70 quilómetros, con 1.600 metros de desnivel positivo acumulado, brindou dous desenlaces moi distintos. Ángel Maneiro (Supermercados Froiz) bateu nos metros finais a Saúl López (Academia Postal – Maceda) na pugna entre corredores elites polo primeiro posto masculino e Lara Lois (RG Bikes Scott) estivo a outro nivel respecto ao resto de competidoras entre as mulleres.
Lara Lois imponse con claridade
O primeiro posto absoluto feminino acadouno por unha ampla diferenza a corredora do RG Bikes Scott Lara Lois. A ciclista elite grovense distanciouse en máis dun cuarto de hora de Mar Delgado (Monteneme-Calvo), nova líder da xeral elite empatada a puntos con Raquel Román (Bici Verde), terceira en Piñor.
Ver esta publicación en Instagram
O premio e os puntos como vencedora máster-40 recibiunos Sofía da Silva (Extol-Zambora.es).
Ver esta publicación en Instagram
Ángel Maneiro imponse nesta proba da Copa Galicia de XCM
O Ourense Termal reuniu a máis de 100 bikers entre os dous eventos que compartiron punto de saída e chegada en Piñor, a segunda xornada da Copa Galicia de XCM e a III BTT Ruta da Prata de cicloturismo. Tal e como acontecera o domingo anterior no XCM Condado-Paradanta, cos títulos do Campionato de Galicia en xogo, a emoción por coñecer ao gañador absoluto masculino mantívose ata a meta. De novo estivo metido na pelexa Saúl López. O monfortino, cuarto nas Neves, fixo esta vez segundo a 5 segundos do noiés Ángel Maneiro, vencedor cun tempo de 3 horas 9 minutos e 33 segundos.
A terceira posición obtívoa o líder da xeral elite da Copa Galicia. Daniel García (Xesteiras), tras adxudicarse a comezos de xuño o Xurés Bike Tour, concluíu esta vez a 42″ de Maneiro. Preto dos tres integrantes do podio estivo o tamén elite Brandán Márquez (V Bikes), cedendo 2′ sobre o primeiro clasificado, e o top-5 completouno Estefan González (Academia Postal-Maceda), a máis de 7:30 do gañador.
Iago Carou (Máster da Louriña) e Uxío Canosa (Extol-Zambora.es) terminaron xuntos na sexta e na sétima praza, respectivamente, logrando o triunfo sub-23 e o máster-40.
No resto de categorías masculinas subiron ao chanzo máis alto o júnior Santiago Otero (XSM), o máster-30 Pablo Fernández (Aerodynamics), o máster-50 Antonio Rodríguez (Ourense Termal) e o máster-60 Carlos Gómez (Ourense Termal).
Líderes da Copa Galicia XCM
A falta dunha carreira puntuable, as clasificacións xerais do certame coordinado pola Federación Ciclismo Galego están comandadas por Santiago Otero en Júnior, Iago Carou en Sub-23, Mar Delgado e Daniel García en Elite, Darío Tubío (Toxo) en Máster-30, Sofía da Silva e Santiago Pérez (Sport Bike) en Máster-40, Mónica Campagna (Ancares Bike) e Antonio Rodríguez en Máster-50, e Carlos Gómez en Máster-60.
A Copa de Galicia de XCM resolverase este domingo, día 5 de outubro, na XXI Marcha Costa da Morte. O prazo para apuntarse remata este mércores ás 23:59 horas.
