A localidade oscense de Sabiñángo foi o espectacular escenario, co Pirineo Aragonés de fondo, do Open de España XCO Cofidis 2021. Nel participaron sete galegas en distintas categorías, sendo as máis destacadas Lara Lois, subcampioa en elite sub23, e María Filgueiras, ouro en cadete. Nesta categoría Uxía Soto acadou o bronce.
Na carreira feminina da elite sub23, prevíase un duelo man a man entre Lara Lois e Meritxell Figueras. A catalá desmarcouse rapidamente das súas contrincantes nos compases iniciais, deixando atrás ás demais. A galega do EXTOL MTB Team chegou á meta só trinta segundos despois da gañadora. Así, Lois clasificouse en segundo lugar.
Durante a carreira, a galega foi quen de aumentar o ritmo e ir de menos a máis para alcanzar a Áurea Ruíz, quen remataría como terceira clasificada. Ambas ciclistas mantiveron un pulso que se decidiu antes do xiro final, no cal Lois foi quen de marcharse en solitario para colgarse a prata.
Na categoría cadete concentrouse a maior participación galega, cun total de cinco ciclistas. Ademais, nesta competición o ciclismo galegou sumou dúas medallas. O ouro foi para María Filgueira, do Caimanes Betanzos, quen se impuxo con autoridade conseguindo a merecida primeira posición con case dous minutos de renda sobre a segunda clasificada.
En terceira posición quedou Uxía Soto, do Avanza Porriño, quen chegou a meta cun tempo de 0:57:51, pisándolle os talóns a Carla Pérez.
Nesta proba participaron as súas compañeiras de club Aroa Otero e Marta Estévez, na quinta e décima posición respectivamente. Tamén competiu Diana Vidal, do Coruxo CC, que finalizou na 18ª posición.
A participación galega rematou en junior, con Laura María Mira, do Avanza Porriño, quen quedou na 12ª posición.
