Contra vento, e case marea, celebrouse a pasada fin de semana o XII BTT de Maceda-Copa Deputación de Ourense, organizado polo Club Ciclista Maceda-Escola José Antonio Hermida. A terceira xornada da Copa Galicia XCO saiu adiante malia a treboada que se viviu na localidade ourensá. O mal tempo non foi obstáculo para Lara Lois, quen se proclamou campioa da categoría elite.
A tromba de auga obrigou a adiar o inicio da segunda manga uns 40 minutos, pero unha vez deu comezo a proba esta desenvolveuse sen problemas. A elite do Extol MTB Team foi a protagonista da categoría absoluta, triunfando con autoridade no circuíto, cun tempo de 01:01:27.231.
As vencedoras femininas en Maceda entre as que está Lara Lois
As dominadoras femininas da Copa neste 2021 prolongaron as súas xeiras en Maceda. Laura Mira (Avanza-O Porriño) gañou nas juniors, Silvia García (Bici Verde) emulouna nas masters e Lara Lois colleitou o seu terceiro éxito noutras tantas probas que se levan celebrado do certame autonómico.
Lara Lois: “A chuvia favoreceu que fose máis fácil de controlar a bici, máis divertido e xoguetón”
“A chuvia favoreceu que fose máis fácil de controlar a bici, máis divertido e xoguetón. Ao ter que acurtar o percorrido, as subidas fixéronse bastante curtiñas e fíxose moi levadío. Foi moi divertido e atopeime moi a gusto”, valorou a grovense Lara Lois, que no podio elite estivo escoltada por Diana Blanco (Bicicletas Chinquena) e Aida García (Team Farto). Noela Saa (Academia Postal), que debutaba esta temporada, vestiuse coa camisola de líder sub23.
A outra novidade nos rankings feminino protagonizouna Aroa Otero, aínda que todo queda en casa. Ocupou a segunda praza no triplo do Avanza-O Porriño na carreira cadete, por detrás de Uxía Soto, e na xeral adianta a Marta Estévez.
A vindeira cita da Copa Galicia XCO será o vindeiro sábado o Campionato Xunta de Galicia-Xaxanbike en Marín e Copa resolverase o 31 de xullo en Ribadumia.
