Disque a can fraco, todo son pulgas. E ao Dépor ABANCA parece que lle veñen todas mal dadas. Lady Andrade, tiña que deixar o partido desta mañan (domingo 14 de febreiro) no minuto 36 por mor dun golpe que recibiu no xeonllo.
A centrocampista colombiana está pendente de probas médicas para coñecer o alcance da lesión. En concreto vanlle practicar unha resonancia magnética para poder diagnosticar se hai algunha afectación no seu xeonllo. A canteirana Eva Dios collía o seu testigo sobre o tepe da Cidade Deportiva de Abegondo.
#DéporABANCARealBetis: cambio n #asnosas no minuto 37, Eva Dios entra no lugar de Lady Andrade#TocaVolverseMollar ⚽️ #UnÚnicoLatido 💙 #razónDÉcorazón pic.twitter.com/3T9s5B7i2q
— RC Deportivo (@RCDeportivo) February 14, 2021
Como se perder 1-3 contra un rival directo como o Real Betis Feminas non abondase, as galegas cruzan os dedos para que o alcance final da lesión de Lady non sexa grave. Serán os servizos médicos do RC Deportivo os que examinen á futbolista e observen o resultado da resonancia magnética para coñecer o alcance exacto da doenza que padece.
O seu adestrador, Manu Sánchez, explicaba en rolda de prensa que todo aconteceu “nun lance do partido no que Lady leva un golpe. Ela achégase á banda e dinos que notou algo raro no xeonllo. Por iso a cambiamos. O doutor, en principio, non viu nada grave, pero faránselle probas”, explicaba o técnico coruñés
Outro punto negro desta xornada foi a expulsión de Noelia Villegas que non estará para o vindeiro partido, por sanción. Sumémoslle que Carolina Arbeláez está lesionada hai semanas e non ten aínda data previsible de recuperación, e os efectivos disponibles para Manu Sánchez esváense por momentos.
