Ambos conxuntos galegos tiveron que sufrir para sacar os tres puntos. O Fisgón acadou unha gran vitoria a domicilio, na casa do sempre complicado, Lacturale Orvina. O filial do Ourense Envialia xogou na casa, ante o último clasificado da liga, que púxolle as cousas moi díficiles as de Rubén Carballo.
Partido marcado polas expulsións
Tres puntos moi sufridos para as de Pili Costa na casa do Lacturale Orvina. As locais puxéronse por riba no marcador moi cedo tras un golazo de vaselina. A reacción das galegas non tardou en chegar, e tras un saque de esquina, Charo poñía o empate no luminoso.
Pili Costa, adestradora de O Fisgón: “Atopámonos o partido que nos esperabamos. Un rival que sempre pon as cousas moi difíciles na súa cancha”.
Tras o sucedido chegaba o vendabal de goles para as de Marín. Vera facía o 1-2 cun tiro exterior e Charo, outra vez en xogada ensaiada tras un saque de banda, poñía terra de por medio no marcador. A pizarra de Pili Costa estaba a funcionar. As galegas fixeron unha presión moi alta para dificultar a saída de balón do Orvina.
Pili Costa, adestradora de O Fisgón: “Na primeira parte tivemos o control do xogo e moitas oportunidades para matar o partido pero fallamos moito. Eu sabía que a segunda parte ía ser complicada. Coa expulsión de Café a segunda parte fíxosenos un pouco longa pero o importante é que os tres puntos vólvense connosco a Marín.
O cuarto gol do Fisgón chegaba tras un catro para tres tras a expulsión da mellor xogadora local. Na segunda parte, a expulsión chegaba cara o lado galego e Café era a xogadora que tiña que abandonar a pista. En inferioridade, as galegas sufriron moito e recibiron dous goles en dous tres para catro.
As azuis notaron as baixas de Jessi e Karen que non viaxaron a Pamplona. Ademais, Mar tampouco puido participar xa que se resentíu das súas molestias. A pesar das baixas, chegouse ao final co 3-4 no marcador. Con esta vitoria, Fisgón ocupa o posto de prata da Segunda División do fútbol sala. Tres puntos moi sufridos pero que valen ouro, ou prata neste caso.
Vitoria moi sufrida pero moi valiosa
O conxunto de Rubén Carballo acadou unha importantísima vitoria no Pavillón dos Remedios ante o pechacandelas da categoría, o Rodiles. As galegas, con estes tres puntos ante un rival directo, mete terra de por medio co descenso.
Rubén Carballo, adestrador do Ourense Envialia “B”: “Tivemos moita precipitación e non conseguimos materializar todas as oportunidades que xeramos. Perdoamos moito e fómonos ao descanso coa vitoria pola mínima”.
O partido estivo marcado pola igualdade tanto no marcador como no xogo. As ourensás lograron irse ao descanso coa ventaxa pola mínima (1-0) tras un gol de Nerea Lorenzo, a pesar de sufrir bastante no último minuto da primeira metade. Inés, tras unha gran intervención, atallou un penalti a falta de 10 segundos para o tempo de lecer.
Rubén Carballo, adestrador do Ourense Envialia “B”: “Nos últimos compases da primeira parte non estivemos moi finas. Xeráronnos máis nun minuto que en toda a primeira metade. Elas tiveron un penalti faltando 10 segundos pero parouno Inés moi ben”.
Tras o empate das visitantes, as locais conseguiron o 2-1 definitivo, obra de Nerea Pérez, que lles permite durmir con tranquilidade e pensar no derbi da semana que ven, ante o Castro. “Son 3 puntos importantes para manter a distancia coa zona de abaixo. Esta vitoria refórzanos e dános confianza para afrontar o derbi da próxima xornada contra o Castro”, comentaba Carballo tras o pitido final.
