En 2014 Madó González, Elena González e Yolanda González poñen en marcha o proxecto La Mochila del Deporte, a través do que buscan promover os valores da actividade física e aprender e compartir a través desta. “Comezamos con La Mochila… para dar resposta a amigas que nunca practicaran atletismo. Agora somos un club federado que compite a nivel autonómico e que, esperemos, pronto tamén o faga a nivel nacional”, conta Madó.
– A.N: Como xorde a iniciativa ‘La mochila del deporte’?
Madó González: Intentabamos dar resposta a amigas que nunca practicaran atletismo e a algunhas nais de nenas e nenos que estabamos adestrando no club. Despois federamos o grupo. Ata a tempada pasada era un equipo basicamente de mulleres máster, e xa o ano pasado empezamos a traballar coa base, o 70% das nosas licenzas son de nenas.
O que empezou como un club máis para mulleres co obxectivo de intentar poñerse un pouco en forma é agora un club federado que participa en todas as competicións a nivel autonómico e que, esperemos, faga pronto tamén a nivel nacional.
– A.N: Un dos vosos obxectivos é formar a través do deporte. Cando debe a rapazada comezar a ter contacto con psicólogas deportivas para evolucionar no mundo do deporte sen que as presións deste poidan facer dano no futuro?
Madó González: A psicoloxía do deporte pode traballar desde o principio. De feito non é o mesmo traballar coa base, que digamos que os obxectivos da psicoloxía do deporte son completamente diferentes. Nós no club o que traballamos con esas categorías non é que intenten conseguir o máximo rendemento, os resultados non son importantes. O que si que o é son precisamente os valores que podemos conseguir a través da actividade física.
Traballamos eses aspectos e a nivel da base e o proceso de aprendizaxe, é dicir, como teñen que aprender tecnicamente a facer un determinado movemento. O que nos interesa é que aprendan, que desfruten e fomentar todos os valores do deporte.
