A base do fútbol galego está en plena forma e o Dépor ABANCA B é boa mostra delo. As xogadoras adestradas por Kevin Cabado lograron pasar á segunda fase competitiva da Primeira Nacional en terceira posición e agora ten opcións de meterse no play off de ascenso a Reto.
Pero o camiño ata esta fase final non foi nada doada. Como explica o propio técnico, “custounos adaptar o equipo, porque parte eran xogadoras recentemente fichadas ou que subían da canteira. Era un equipo practicamente novo”, recorda.
Unha vez superado un período de adaptación, os resultados comezaron a chegar e con eles as alegrías das vitorias. A goleada 9-0 ao Umia na primeira xornada precedeu á derrota ante o Interrías por un 3-1 e desde entón as branquiazuis alternaron derrotas, empates, vitorias axustadas e máis goleadas, como o 15-0 ao CD Valladares. As coruñesas tiveron un balance de dúas derrotas por volta, rematando a primeira fase terceiras con 30 puntos e sendo o segundo mellor local (19 puntos foron obtidos desta forma).
A segunda fase tamén comezou con bo sabor de boca, cun 5-0 ante o mellor clasificado, o Oviedo e ademais en casa, xogando en Abegondo.
Con todo, o adestrador prefire poñer o foco de atención na formación. “Temos cinco xogadoras que debutaron en Primeira e xa están metidas nas súas rutinas”, sinala. Desta forma, os altibaixos que tiveron que afrontar polas baixas das canteiras convocadas por Manu Sánchez sempre foron “ben recibidas”.
As xogadoras de Kevin Cabado apuntan ao equipo A
“O noso maior logro é que debuten en Primeira División, está claro”, sentencia Kevin Cabado. Para o míster, é moito máis importante ver medrar ás súas xogadoras que sumar os tres puntos de cada domingo: “Algunha fin de semana non conseguíamos o resultado desexado na nosa competición, pero vías o día do Levante a María Figueroa como titular ou a Eva Dios asentada xogando varios partidos co primeiro equipo, e iso é maior logro que ascender a Reto Iberdrola”.
Kevin Cabado: “Vías o día do Levante a María Figueroa como titular ou a Eva Dios asentada xogando varios partidos co primeiro equipo, e iso é maior logro que ascender a Reto Iberdrola”
O nome propio máis destacado destas futuras promesas é sen dúbida Eva Dios. Á centrocampista, que antes de xogar coa camiseta branquiazul vestiu a do Victoria FC compostelán, case se lle quedan curtos os campos de Primeira Nacional. Xa é habitual ler o seu nome nas convocatorias de Manu Sánchez, e este ano tivo a oportunidade de formar parte da Selección Española sub19.
“Se leva falando de Eva moitos meses, pero o verdadeiro paso o deu este mes”, valora o seu adestrador, Kevin Cabado. Segundo o técnico, nestas pasadas semanas Eva deu “un paso de xigante”, algo que se puido comprobar no partido ante o Oviedo: “Foi unha xogadora diferencial”.
O seu futuro semella depender só dela, e “se é constante, se segue traballando e non se cre que conseguiu xa algo, pode chegar a ser unha xogadora de referencia e pode chegar perfectamente ao nivel de Teresa Abelleira”, valora Cabado.
Kevin Cabado: “Eva Dios pode chegar perfectamente ao nivel de Teresa Abelleira“
O B non pensa nas posibilidades de descenso do A
Manu Sánchez tamén confía habitualmente nela, nunha tempada na que calquera reforzo é benvido. O Dépor ABANCA A está a pasar por un momento complicado, sendo colistas da máxima categoría e favoritas ao descenso.
Este panorama non preocupa en exceso ao conxunto de Cabado, xa que como el mesmo indica “cremos que van conseguir a salvación e estamos desde abaixo intentando aportar todo o posible para axudalas”. O filial céntrase no partido a partido e no vestiario branquiazul non se fala nin de ascensos nin descensos.
“Non pensamos na situación do A ou na nosa, que é moi difícil pasar nesta segunda fase, pero non é algo que nos obsesione. Se por desgracia se da o descenso, o que temos que demostrar é que moitas xogadoras do B están preparadas para xogar co primeiro equipo se fose necesario”, aclara. Segundo a estimación de Cabado, entre sete e oito xogadoras do B “poderían formar parte perfectamente do equipo en Primeira División”.
O hándicap de adestrar a un filial
Coa dobre motivación de ver ás súas xogadoras trunfar no B e no A, semella que adestrar a un equipo filial trae sempre alegrías, pero tamén ten unha cara oculta.
O feito de contar con baixas practicamente cada semana, aínda que estas sexan benvidas, limita os plans de xogo de Cabado. “Outros rivais da nosa liga que non son filiais, Interrías, Victoria ou Gijón, priorizan cada semana xogar coas 11 que lles poden facer ganar o partido e nós priorizamos a formación das mozas”, explica. Por este motivo, a prioridade para o técnico é sempre a formación “e non na posición”.
A clave para pasar de fase está na adaptación
Isto non quita que no Dépor ABANCA B apunten a estar no play-off de ascenso a Reto Iberdrola. Antes diso, será necesario vencer ás rivais do grupo 1B, o asturiano – cántabro.
Tres rivais ata agora case descoñecidos, Gijón, Oviedo e Racing son os retos das herculinas nesta fase. As novas tecnoloxías axudan a seguir de preto a estas contrincantes, e ademais o tempo entre fases permitiu que o equipo de Cabado se preparase a fondo. “Creo que no fútbol actual non hai sorpresas”, declara o técnico.
Analizando aos conxuntos rivais, o técnico considera que Racing e Oviedo comparten sistemas de xogo similares, con futbolistas desequilibrantes nas liñas exteriores. O máis diferencial é o Gijón, cun plantel de xogadoras experimentadas e máis competitivo.
Non obstante, para Kevin Cabado a clave estará na adaptación dos equipos, “a maior diferenza vai ser xogar en casa ou fóra”, explica. Segundo sinala o coruñés, o feito de xogar contra clubs de fóra de Galicia dificulta a preparación dos partidos, xa que o plantel ten que adaptarse a novas rutinas para poder ser regular. Na súa opinión, o melllor posicionado para pasar de fase é o Oviedo, pero calquera cousa pode pasar.
Un formato desfavorecedor
O formato tampouco facilita o traballo dos equipos, xa que a multitude de competidores e a complicación da propia competición fai case imposible cumprir o soño do ascenso.
Cabado subliña que entende que a Real Federación Española de Fútbol “o tivo moi difícil, porque ao non ter descensos había moitísimos equipos, pero o considero inxusto”, recalca.
O adestrador considera que entre os conxuntos de abaixo hai moita diferenza no nivel de competición e o feito de que seis equipos opten a perder a categoría é “unha salvaxada”.
Kevin Cabado: “Podes gañar todos os partidos da segunda fase e non pasar ao play off”
Outro factor polémico son os coeficientes. “O considero inxusto porque o Oviedo trae a vantaxe moi grande do coeficiente e o Gijón o mesmo e podes gañar todos os partidos da segunda fase e non pasar ao play off practicamente. Para min se fixo demasiado deprisa e correndo para salvar o ano. Xogamos moitas xornadas en moi pouco tempo”, engade.
A xuventude do plantel do Dépor ABANCA B non frea o seu progreso
Pase o que pase neste tramo final da tempada, o Dépor ABANCA B cumpriu os seus obxectivos principais: formar parte da fase de ascenso e dar xogadoras de calidade ao equipo A. Por iso, a clasificación non é unha preocupación para as branquiazuis, que teñen un proxecto de longo prazo.
Malia a xuventude do seu plantel, o máis novo da liga “con diferenza”, as herculinas están a avanzar a pasos axigantados. A goleada ao Oviedo, o mellor clasificado, da moitvos para ser optimistas e soñar con competir na seguinte categoría.
Kevin Cabado non se aventura a dicir una favorito claro, xa que na súa opinión “o resultado da primeira xornada contra o Oviedo demostra que da igual quen quede primeiro, segundo e terceiro. Creo que os equipos estamos moi igualados e o que sexa máis regular é o que vai a xogar o play off“, baticina.
