- A XII San Silvestre Coruña rendeu homenaxe a Luisa Vázquez, ex xogadora do Medina e presidenta da asociación de pacientes con cancro de mama do Hospital Vall d’ Hebrón de Barcelona, que recibiu unha placa da concelleira de Deportes da Coruña, Mónica Martínez.
- A proba tiña un importante protocolo anticovid que esixía aos participantes certificado de vacinación e máscara, ademais de dar a saída en caixóns para manter a distancia e por quendas.
Nasr Bouchaib e Karina Callón son os gañadores da duodécima edición da San Silvestre Coruña. En categoría feminina impúxose Karina Callón, do Club Atletismo Sada, con 26:28, mentres que en terceira posición, con 27:29, entrou a súa compañeira de club Inés Papín, unha clásica desta proba, na que adoita coarse no podio. A prata foi para Carolina Filgueiras, con 27:16 e Irea Alén, do Fogar Tríatlon Carballo, foi cuarta con 28:31.
En categoría masculina Bouchaib, que debutaba na carra, do CD Arzúa, impúxose cun tempo de 21:42, seguido de Alberto Castiñeira, gañador da edición de 2017, que entrou co mesmo tempo a só unhas décimas de diferenza, e de Andrés Prieto, con 22:31. Abdelaziz Fatihi, gañador varios anos, entrou nesta ocasión cuarto.
Na categoría por equipos o premio foi para Run&Callos e os premios aos disfraces leváronllos Ferrero Rocher e os Marines Enki, que ían do vello oeste. Na categoría infantil todos os participantes levaron unha medalla pero o equipo con máis participantes, que tiña un premio especial foi o Hogar de Santa Margarita.
Homenaxe á coruñesa Luisa Vázquez xogadora do Medina
A San Silvestre Coruña rendeu homenaxe a Luisa Vázquez, presidenta da asociación de pacientes con cancro de mama do Hospital Vall d’ Hebrón de Barcelona, que recibiu unha placa de recordo de mans da concelleira de Deportes do Concello da Coruña, Mónica Martínez. Luisa Vázquez é coruñesa, aínda que leva media vida en Barcelona, e sempre practicou deporte, desde os seus tempos do Medina de baloncesto e de balonmán. “Isto convencida de que me recuperei en gran parte grazas ao deporte”, afirma.
Despois do primeiro cancro que sufriu tomou conciencia da soidade de moitas mulleres que se enfrontan a esta situación e decidiu fundar a asociación, coa que fomentan o deporte e organizan torneos de pádel cuxa recadación vai íntegra á investigación.
Saídas graduadas por quendas e protocolo anticovid
A San Silvestre Coruña, que esgotou os 4.000 dorsais dispoñibles adiantou a saída ás 16.45 para avectar menos ao tráfico e debido ás saídas graduadas con motivo do protocolo de continxencia elaborado para tratar de evitar a propagación do covid-19.
A proba contaba cun plan específico para previr os contagios de COVID-19, no que se obrigaba a todos os participantes de máis de 12 anos a exhibir o certificado de estar vacinado (ou de pasar a enfermidade no últimos seis meses) ou un test de antígenos ou PCR de 72 a 48 horas ao recoller a bolsa do corredor.
Cada participante tiña unha pulseira de cor para cada quenda de saída, co número e a hora de chamada e tiñan que levar a máscara en todo momento, moi especialmente na zona de meta, onde se produce a maior concentración de persoas.
A organización dispoñía de máscaras para quen puidese ter algún contratempo coa súa. As carreiras infantís celebráronse ás 16.00 horas, tal e como estaba previsto, tamén por quendas de participación, con máscaras e seguindo o protocolo sanitario vixente para evitar a transmisión da COVID-19.
Para quen non puideron estar de forma presencial ou para quen queira facer o seu propio reto, a carreira estará dispoñible de forma virtual a partir do martes grazas á aplicación oficial, que se pode descargar para dispositivos Android e Apple, ou na páxina web www.sansilvestrecoruna.com.
Máis do 40% das persoas corredoras veñen de fóra da Coruña
Cada ano son máis os participantes da San Silvestre Coruña que proceden desde fóra da Coruña, o que reforza a capacidade desta proba de funcionar como un atractivo turístico para promocionar a cidade. Se no ano 2019 o 25% dos corredores eran foráneos, en 2021 esta porcentaxe increméntase ata chegar ao 41%.
Outro apartado que tamén crece é a participación feminina. Se en 2019 era do 35%, en 2021 aumenta ata o 37%, cun incremento especialmente rechamante na categoría infantil de 7 a 8 anos. O perfil do corredor da San Silvestre Coruña é o dun home de mediana idade, entre 20 e 50 anos e afeccionado. A máis veterana da carreira era Rosa, con 75 anos, e o decano, Enrique, con 81.
Vertente solidaria da San Silvestre Coruña
Do mesmo xeito que en anos anteriores, a San Silvestre Coruña mantivo nesta duodécima edición o seu carácter solidario, nesta ocasión co apoio a dous proxectos. Por unha banda, recollíanse alimentos para a Cociña Económica, (con puntos de entrega durante a entrega de dorsais e o mesmo día da carreira), pero tamén se colaborou desde a organización co proxecto Reis Magos de verdade, no que se recollen cartas de nenos e maiores para que quen desexe colaborar poidan converterse en paxes das súas Maxestades de Oriente para levar agasallos e sorrisos a quen máis o necesitan. Quen desexe colaborar poden facelo apuntándose na páxina web www.reyesmagosdeverdad.org.
Ademais, na súa intención de ser unha carreira integradora, a San Silvestre Coruña dispoñía de “dorsais solidarios” de apoio aos corredores e corredoras con capacidades especiais que o necesitasen.
