Ourense será a sede do Campionato de España Infantil, competición que se celebrará do 16 ao 18 de abril de 2021 no Pavillón Municipal dos Remedios. A cita homenaxea a Carmen Barro Pita. Participarán case 700 deportistas nas modalidades de kata (técnica) e kumite (combate), pertencentes ás categorías benxamín, alevín, infantil e xuvenil.
Será a primeira vez que a Cidade das Burgas acolla unha competición de karate de ámbito nacional, organizada pola Real Federación Española de Karate, en colaboración coa Secretaría Xeral para o Deporte (Xunta de Galicia), o Concello de Ourense e a Deputación de Ourense, segun informa a Federación Galega de Karate.
A competición estrutúrase do seguinte xeito:
Venres, 16 de abril (14:00 horas):
- Kata Alevín e Infantil Masculino.
- Kumite Alevín e Infantil Masculino.
- Finais.
- Entrega de Trofeos.
Sábado, 17 de abril (08:30 horas):
- Kata Xuvenil Masculino e Feminino.
- Kata Benxamín Masculino e Femenino.
- Finais e Entrega de Trofeos.
- Kumite Xuvenil Masculino e Feminino.
- Finais.
- Entrega de Trofeos.
Domingo, 18 de abril (08´30 horas):
- Kata Alevín e Infantil Feminino.
- Kumite Alevín e Infantil Feminino.
- Finais.
- Entrega de Trofeos
A competición celebrarase sen presenza de público, aínda que se poderá seguir en directo a través da canle de YouTube da Real Federación Española de Karate.
O evento servirá ademais para homenaxear no ámbito estatal unha muller do deporte galego que tamén foi importante no karate español: Carmen Barro Pita, quen fora presidenta da Federación Galega de Karate ata o seu falecemento no ano 2020. Entre outros ámbitos, no karate galego e estatal o pasamento de Carmen Barro supuxo un fondo pesar.
A selección galega participante neste evento estará integrada por 44 deportistas pertencentes a 15 clubs das catro provincias galegas. Os representantes ourensáns nesta competición son:
- Nazan Barreda Fernández, do Club River Stone do Barco de Valdeorras.
- Fabio Alén Bejarano, do Club Mizukami de Ribadavia.
- Jacobo Casado Fernández, do Club de Karate de Maceda.
- Fabio Rodríguez Cidre, do Club de Karate de Maceda.
Quince clubs galegos representados
O resto de integrantes da selección galega pertencen aos seguintes clubs: Club San Francisco Teo (Teo), Escola Superior de Karate de Narón (Narón), Renbukan (Ferrol), Grupo Bazán (Ferrol), Artes Marciais Fene (Fene), Bunkai (Ferrol), Ávalon Kai (Santiago de Compostela), Karate-do Carballo (Carballo), Escola de Karate Akai-Ryu (Negreira), Escola de Karate LN (A Coruña), Escola Deportiva Shihan (Lugo) e Gimsport (Pontevedra).
A presenza galega complétase coa participación como árbitros de José Ignacio Muñoz Pérez, Diego González Llecha, David González Vázquez, Enrique Blanco Gómez e Carla Rodríguez Fernández.
A competición pode seguirse na canle de YouTube da RFEK
Lete Lasa: “Carmen Barro foi e será parte da historia dun deporte tan nobre como ela”
No acto de presentación desta competición estivo o secretario xeral para o Deporte, José Ramón Lete Lasa, acompañado do delegado da Xunta en Ourense, Gabriel Alén.
Nas súas verbas, Lete Lasa destacou a importancia do “deporte para toda a vida”, un dos lemas do Plan Galicia Saudable que ten na plataforma DAFIS, unha das súas ferramentas máis importantes, orientada a toma de valoracións da actividade física e da saúde dos nenos para que tanto os seus profesores, como os seus pediatras e os responsables deportivos teñan acceso a estes datos e así establecer programas adecuados que contribúan á mellora da súa saúde.
Neste sentido tamén destacou como a Xunta de Galicia faise cargo do seguro deportivo escolar e federado para os nenos de entre 6 e 16 anos ou como o estudo do Instituto de Investigación Biomédica da Coruña do SERGAS revela que a actividade física mellora substancialmente a forma física e a saúde dos nosos nenos e nenas e que os brotes detectados no deporte galego apenas afectan ao 0,2% dos equipos.
Por todo isto valorou a importancia da celebración deste Campionato Infantil en Ourense onde participarán preto de 700 deportistas das categorías benxamín, alevín, infantil e xuvenil (dende os 7 ata os 13 anos) dos que 44 serán deportistas galegos de 15 clubs da comunidade. O campionato terá lugar no Pavillón dos Remedios, unha instalación recentemente renovada pola Xunta de Galicia cun investimento de 2 millóns de euros.
José Ramón Lete Lasa, secretario xeral para o Deporte da Xunta de Galicia: “Barro Pita foi unha muller que dedicou boa parte da súa vida a promover o karate a nivel automómico, desde a presidencia da Federación Galega e a nivel estatal, desde a vicepresidencia da Federación Española. Carmiña foi, é e será parte da historia deste deporte tan nobre como o era ela”
O mandatario galego tivo tamén unhas verbas de lembranza para Carmen Barro Pita, a que fora presidenta da Federación Galega de Karate e tristemente desaparecida en xaneiro de 2020. “Unha muller que dedicou boa parte da súa vida a promover o karate a nivel automómico, desde a presidencia da Federación Galega e a nivel estatal, desde a vicepresidencia da Federación Española. Carmiña foi, é e será parte da historia deste deporte tan nobre como o era ela”, sentenciou Lete Lasa.
Por último, o secretario xeral comprometeu o seu traballo para seguir promovendo o karate para que, entre outros obxectivos, siga sendo olímpico tras os Xogos de Toquio 2020.
