A Federación Galega de Karate informaba recentemente dos cambios que o mantemento do estado de alarma por mor da crise sanitaria polo COVID-19 e as fases de desescalada, marcadas polo Goberno español, permitirían celebrar segundo as limitacións que se marcan.
Así, unha vez coñecidas as previsións orientativas para o levantamento das limitacións establecidas durante o estado de alarma, que permitirán avanzar gradualmente no proceso de desescalada e recuperar de maneira progresiva a normalidade, a Federación Galega de Karate e D.A. adoptou unha serie de decisións en relación á súa actividade federativa.
Con respecto ás competicións autonómicas anúnciase a cancelación do Campionato Galego de Clubs (previsto para ser celebrado en As Pontes o 24 de maio de 2020), unha medida que se engade á cancelación xa comunicada anteriormente do Campionato Galego Infantil (As Pontes, 29 de marzo de 2020).
As competicións canceladas celebraranse no último trimestre deste ano, entrando de forma excepcional no calendario da tempada 2020-2021. As probables datas de celebración destas competicións serían, segundo indica a Federación Galega:
- Campionato Galego de Clubs 30 outubro / 1 de novembro de 2020.
- Campionato Galego Infantil 5 – 6 decembro de 2020.
En relación ao Campionato Galego Infantil cancelado, todos aqueles clubs que efectuasen o pago das súas inscricións, deberán de porse en contacto coa federación para proceder á devolución a través do correo electrónico.
Mantense o exame de graos
Con respecto aos exames de graos, cancélase o exame previsto para o 27 de xuño en Santiago de Compostela, pero mantense a convocatoria do mes de setembro, sendo de aplicación a normativa de graos en vigor.
Formación para técnicos e xuíces de Karate
Informa tamén a Federación Galega de Karate e D.A. que se mantén a celebración do Curso de Técnico Deportivo Nivel I de Karate (único co número de pre-inscritos suficientes para a viabilidade desta actividade). Con todo, apuntan que o “bloque específico podería ter lugar no mes de setembro, a condición de que se confirmen as actuais previsións do proceso de desescalada e dispóñase dun número suficiente de inscritos definitivos”.
No caso do curso de titulación e actualización de xuíces de graos, trasládase a celebración desta actividade para a tempada 2020-21, nunha data aínda por confirmar.
