- É a cuarta vez que a escuadra neerlandesa do Juro Unirek xoga a European Cup e nas tres veces anteriores foi eliminada por equipos españois (Málaga, Granollers e Rocasa).
- O conxunto dos Países Baixos que marcha décimo na súa Liga, vén de superar ao Dicken finlandés na rolda anterior.
O Mecalia Atlético Guardés xa coñece o seu primeiro escollo no camiño cara ao seu soño europeo. O sorteo para a rolda 3 da European Cup deparou ao Juro Unirek VZV dos Países Baixos como rival para estrearse esta tempada en competición continental, onde o conxunto miñoto leva instalado dez anos consecutivos.
A sorte deparou un cruzamento no que o Mecalia Atlético Guardés xogará o primeiro choque como local, o 3 ou o 4 de decembro. A volta será unha semana despois na localidade de ‘t Veld, situada na provincia de Holanda Setentrional, a 18 quilómetros da cidade de Alkmaar e a 63 da capital Amsterdam. A idea da entidade do Baixo Miño é ter lista a reforma do pavillón da Sangriña para ese primeiro duelo da serie. Sería un partido ideal para inaugurar o novo Inferno.
Como cabeza de serie e equipo con mellor coeficiente EHF da competición, a escuadra de Abel González librouse de disputar a rolda 2 -que en realidade é a primeira- na que si estivo o Juro Unirek VZV. As neerlandesas superaron con solvencia ao Dicken de Finlandia, amparadas nun encontro de ida no que a eliminatoria quedou practicamente resolta. 22-13 venceron as locais o 8 de outubro. Unha semana despois, cederon na volta, disputada en Helsinqui (24-26). Con todo, o pase nunca estivo en perigo e pechouse cun tenteador global de 46-39.
O equipo holandés do Juro Unirek VZV non tivo un bo comezo ligueiro. Marcha na décima posición (de doce) tras sumar unha vitoria e catro derrotas nas cinco xornadas que disputou. Con todo, leva un tempo movéndose na zona alta e o mellor exemplo é que non é un novato nesta competición.
Traxectoria do Juro Unirek VZC na European CUP
De feito, será a cuarta vez que o Juro Unirek VZV a dispute nos últimos anos. Nas tres anteriores, deuse a curiosidade de que caeu eliminado fronte a equipos españois. O curso pasado, claudicó fronte ao Costa del Sol Málaga en oitavos de final (60-41). Na campaña 2019/20, o seu verdugo foi o KH7 Granollers en cuartos de final (61-56). E na tempada 2017/18, sucumbiu fronte a Rocasa Gran Canaria na rolda 3 (64-44), a mesma na que se medirá ao Guardés nun mes e medio.
A escuadra miñota do Mecalia Atlético Guardés tratará de que a historia se repita e seguir dando pasos cara ao soño de xogar unha final continental. O décimo ano consecutivo en Europa ben o merece.
