5 Coruña FS e Pescados Rubén Burela FS veranse as facianas na disputa da Copa Galicia mañá xoves 15 de setembro a partir das 19:00 horas no pavillón de Novo Mesoiro, na cidade da Coruña. O técnico das Guerreras Laranxas, Julio Delgado, é cauto pero advirte que o obxectivo é gañar o título autonómico.
O conxunto laranxa volve disputar a Copa Galicia con intencións de conquistalo novamente despois de non pasar a eliminatoria de semifinais contra o Ourense Envialia na pasada edición. As Guerreiras Laranxas queren manter a súa senda de triunfos e títulos. Por contra, este ano foron as ourensás as que quedaron apeadas da competición copeira autonómica en cuartos de final ao ser superadas na quenda de penaltis polo Viaxes Amarelle FSF da Coruña.
O primeiro paso para levar o título, é gañarlle ao 5 Coruña FS que se vai enfrontar ao CD Burela FS mañá xoves 15 de setembro ás 19:00 horas nunha das eliminatorias de cuartos de final desta competicion da A Real Federación Galega de Fútbol.
O adestrador Julio Delgado amosase cauto
Julio Delgado, técnico do equipo laranxa, afirmaba que a Copa Galicia “é o título da nosa comunidade e fainos ilusión. Imos ir paso a paso, pero o obxectivo é gañar e engadir un título máis ao palmarés.”
Consultado sobre o estado actual do bloque do Pescados Rubén Burela FS para enfrontarse ao 5 Coruña FS nestes cuartos de final explicaba: “O equipo está a traballar ben. Estamos concienciados de que vai ser un ano duro, sobre todo no inicio, polas lesións. Este tipo de partidos, aínda que sexa cun rival teoricamente inferior, hai que mentalizarse para sacalos adiante e respectar ao máximo ao equipo contrario, para así tomar boas sensacións no partido de liga do sábado “.
Coa mirada máis a longo praza e pensando en que este curso as da Mariña aspiran a máis títulos Julio Delgado amosábase cauto e non lanzaba as campás a voar. “É moi pronto”, advertía. “Temos incorporacións novas, moitas lesións e renovouse todo a plantilla ,queda moito por conxuntar”, explicaba Julio Delgado. “Con todo, a xente está a afacerse ao sistema de xogo. Vexo unha predisposición absoluta para traballar e é o que me fai ao meu feliz como adestrador e a elas como xogadoras, e sempre que podamos sacar sábado a sábado bos resultados é ben recibido”, argumentaba esperanzado e confiado nas posibilidades do grupo que adestra.
O primeiro paso para conseguir o título é alzarse coa vitoria este xoves no pavillón Novo Mesoiro, e o equipo ten ilusión por facelo. O 5 Coruña FS chega ao partido tras recibir o duro golpe anímico da perda da asúa adestradora, Fani Martínez.
