O CV Arenal Emevé aposta pola canteira como eixe central do seu plantel para a próxima tempada en Liga Iberdrola. As últimas renovacións do club lucense son Julia Paradela e Inés Rivas, nunha decisión que o adestrador, José Valle, califica de “unha recompensa ao seu traballo e un premio á canteira”.
Esta será a segunda tempada co primeiro equipo de maneira consecutiva para ambas xogadoras. A receptora / oposta Julia Paradela competirá por sexta tempada coa camiseta das loitadoras, desde que chegou ao Emevé con 16 anos. Con esta renovación, competirá por terceira vez co cadr sénior en Liga Iberdrola. Desde o club a definen como “unha xogadora tenaz, traballadora e cunha gran importancia no grupo”.
Pola súa parte, a central ribadense Inés Rivas xogará por terceiro ano coas loitadoras. A xogadora chegou procedente da canteira do club coruñés do CV Autos Cancela Zalaeta. En palabras do Emevé, a ribadense caracterízase polo “espírito de sacrificio e competitividade”.
José Valle: “Se este ano seguen nesa liña terán máis oportunidades e axudará a mellorar o nivel do equipo ao aumentar a competencia”
José Valle resaltou o traballo da canteira lucense a coruñesa, con Jorge Barrero. “A súa continuidade é importante para nós porque nos axudan a dar nivel nos adestramentos e pouco a pouco foron contando con máis minutos. Se este ano seguen nesa liña terán máis oportunidades e axudará a mellorar o nivel do equipo ao aumentar a competencia”, explica o adestrador.
