A coruñesa e promesa do Skate, Julia Benedetti xa ten a mente posta nos vindeiros Xogos Olímpicos que se disputarán en Toquio o ano que vén. A galega está no 18º lugar da feminina na modalidade de Park e de seguro que loitará para mellorar o seu posto. Talento e ganas non lle faltan a unha das mellores promesas do Skate do panorama galego e nacional.
O debut da RFEP nuns Xogos Olímpicos chegará no verán do 2021
Haberá que esperar ata o vindeiro verán cando, a Selección Española de Skateboarding debute nuns Xogos Olímpicos. Ata o momento, esperar e prepararse para a gran cita. Cando as autoridades sanitarias o autoricen, a Selección Española centrarase na nova tempada de clasificación para Toquio 2021. O pasado mes de xaneiro,a herculina Julia Benedetti, Jaime Mateu, Danny León, Mar Barreira e Andrea Benítez, dirixidos polo seleccionador nacional, Alain Goikoetxea, realizaron a súa primeira concentración do ano no País Vasco.
Actualmente, os deportistas adéstranse nas súas casas co obxectivo de estar o mellor preparados posibles cando poidan volver a patinar e pendentes das novas datas e localizacións que designe World Skate.
Lembramos que, tras a celebración do OI STU Open Skateboarding de Río de Janeiro, a primeira proba puntuable de clasificación da segunda tempada, Julia Benedetti ocupa o 18º lugar, mentres que Jaime Mateu e Danny León ocupan o posto 22º e 32º, respectivamente, da clasificación en categoría masculina.
Doutra banda, en Street, Andrea Benítez está na posición nº31 e Mar Barreira, no posto 40 da clasificación.
Como no ranking xeral de Park e Street, países como Estados Unidos ou Brasil, contan con máis de tres skaters (máximo de deportistas que poden representar ao seu país), Julia Benedetti, Andrea Benítez, Jaime Mateu e Danny León ocupan posicións de clasificación para os Xogos Olímpicos de Tokio 2021.
