Aínda non ten idade para conducir, pero móvese a toda velocidade sobre as catro rodas da súa táboa de skateboard. A coruñesa Julia Benedetti é a última galega polo momento en obter o seu billete para entrar na Villa Olímpica este verán.
Rozando os 17 anos Benedetti acudirá a Toquio disposta a demostrar o seu nivel entre as mellores riders do mundo. Non se plantexa metas máis aló de dar o mellor de si mesma e “gozar da experiencia”.
Competir nuns Xogos Olímpicos é un momento único para calquera deportista, pero se aínda por riba a oportunidade chégate antes incluso de saír do instituto… imaxínense a emoción que ten que supor para que o viva. Nesas anda a patinadora coruñesa Julia Benedetti que hai uns días, en Iowa, conseguía certificar a súa clasificación para representar a España en Toquio 2021 na modalidade de skate park.
Agora, xa co billete para os XX.OO. no peto, a súa cabeza ten que volver, canda menos varias horas ao día, á realidade dunha adolescente de 16 que enfronta exames finais no instituto coa mesma esixencia que buscou con empeño amosar que era a mellor española e merecía ir a competir á gran festa do deporte. A herculina será unha das deportistas máis novas da expedición española aos Xogos Olímpicos.
Julia Benedetti: “Toca compaxiñar exames e adestramento”
“Conseguín a clasificación a Toquio ao longo de varios campionatos. O último hai ben pouco en Estados Unidos”, explicaba aos medios que lle preguntaban pola súa xesta ao rematar un acto contra a violencia de xénero que organizou a Xunta de Galicia con máis deportistas olímpicos e no que partipou o pasado venres. “Agora vou tentar adestrar ao máximo, aínda que tamén teño o final de curso cos exames, pero compaxinarei tentando adestrar todo o que poida”, avisaba a rider galega.
Cada vez que acude a cun campionato internacional abre os ollos e aprende empapándose de todo o que a rodea. Pero sobre todo, a súa cabeza empeza a bulir pensando en novos trucos que facer sobre a táboa. Preguntada se tomou nota para algunha nova pirueta no Dew Tour en Des Moines (Iowa), a proba na que acadou a praza para Toquio explicaba: “Ao ir a campionatos ves o nivel que teñen outras rapazas, motívaste aprender novos trucos máis difíciles e seguir mellorando”.
Tamén aprende e mellora con cada concentración da Selección Española á que lle cita o seleccionador nacional de skate, Alain Goikoetxea.
Sen dúbida, en terras niponas, agárdanlle momentos irrepetibles na súa traxectoria deportiva e persoal. Polo de agora, non se lle ve nerviosa. Ou a profesión vai por dentro.
Julia fala ante os medios calmada, sen presión e sen marcarse máis aspiracións de cara a Toquio 2021 que ofrecer a súa mellor faciana na pista. “Aspiracións? Non o sei… Eu vou tentar facelo o mellor posible. Vou dar o mellor de min e logo como quede, xa… Vou tentar pasalo ben e gozar da experiencia que é o máis importante”.
Julia Benedetti compite na modalidade de park. Di que por explicalo dun xeito sinxelo “é unha piscina baleira na que fas os teus trucos. Tes uns 45 segundos e fas o que queras. Valórase e velocidade, o estilo, o difíciles que sexan os trucos que fagas, e con iso dante unha puntuación”.
Imaxinan? 45 segundos para demostrar o traballo de catro anos, dise axiña, pero non hai marxe de erro.
Este venres, Julia Benedetti participaba nun acto no que a conselleira de Emprego e Igualdade, María Jesús Lorenzana, e o secretario xeral para o Deporte, José Ramón Lete, presentaron en Pontevedra o acordo de colaboración que permitirá desenvolver Reto Galicia-Toquio con Igualdade.
Alí estivo a rider coruñesa, xunto a outros deportistas como triatleta Javier Gómez Noya, ou o parataekwondista Álex Vidal. A través de videoconferencia tomaron parte tamén outras moitas e moitos deportistas con aspiracións a estar nos Xogos Olímpicos deste ano que poderán integrarse na campaña “Reto Galicia – Toquio con Igualdade”. Foi o caso de: Desirée Vila, Susana Rodríguez Gacio, Sara Álvarez, Saleta Fernández, María Bernabéu, Támara Echegoye, Carlos Arévalo, Alberto Seoane, Víctor Castro, entre doutros.
Julia Benedetti, patinadora coruñesa pon un exemplo non moi lonxano sobre desiguladade no deporte: “Hai uns anos no Campionato de España ás rapazas dábannos a metade ca os rapaces por un primeiro posto. Xa non”
Precisamente consultada polos medios de comunicación ao final do acto ao respecto da igualdade no deporte, e máis en concreto no skateboard, Julia Benedetti, lembrou que hai dous anos “no Campionato de España non tiñamos os mesmos premios. Ás rapazas dábannos a metade por un primeiro posto. Agora xa non, está igualado”.
A skater coruñesa do Maroña Indoor e embaixadora da firma de agua galega Cabreiroá, está arestora dentro das 20 mellores do ránking mundial de skate park do World Skate un mérito que lle outorgou o dereito a estar en Toquio ao ser, ademais a mellor española nesta modalidade.
Está pendente aínda o Mundial de Skate Street que terá lugar en Roma e será o preolímpico definitivo para esa modalidade. En Toquio haberá 20 mulleres competindo en skate park e outras tantas en skate street, exactamente o mesmo número que homes. Polo que Julia está entre os 80 elixidos de todo o mundo para competir nos primeiros Xogos nos que o skateboard é modalidade olímpica. So con iso, xa entra na historia. Se ademais acadase medalla ou diploma o seu mérito sería maiúsculo.
Ver esta publicación en Instagram
A data onde esta moza galega competirá nos Xogos Olímpicos de Toquio 2021 é o mércores 4 de agosto de 2021. Entre as 9:00 e as 13:40 horas se disputará no Parque de Deportes Urbanos de Ariake a competición (salvo cambios) nesta orde:
- Mangas preliminares femininas de park.
- Final feminina de park.
- Ceremonia de la victoria feminina de park.
