O secretario xeral para o Deporte, José Ramón Lete Lasa, e a delegada territorial da Xunta en Vigo, Marta Fernández Tapias, mantiveron unha xuntanza coa esgrimista viguesa do Club El Olivo, Judith Rodríguez, que vén de proclamarse o pasado fin de semana en Ciudad Real dobre campioa de España de esgrima adaptada en florete, tanto na competición individual como por equipos, ademais de acadar unha medalla de bronce en espada.
Lete Lasa destacou a capacidade de superación e resiliencia de Rodríguez, que tras o accidente que sufriu en 2018 foi quen de “reinventarse e comezar unha nova carreira na esgrima adaptada que xa comeza a dar grandes resultados”. “Agora, de novo, Judith Rodríguez volve dar un exemplo de esforzo e sacrificio e, tras case un ano sen competir polas lesións, regresa cun dobre campionato nacional”, dixo.
O mandatario galego asegurou que a Xunta de Galicia seguirá impulsando a traxectoria de Judith Rodríguez de cara ao seu obxectivo prioritario, os Xogos Paralímpicos de París 2024.
