Falar de Joziane De Oliveira, Jozi, é falar de toda unha lenda do fútbol sala. A porteira hispano-brasileira converteuse co tempo en todo un mito deste deporte, sendo pentacampeona do mundo e unha das principais valedoras de todo o que conseguiu o noso club desde a formación do equipo feminino. O CD Burela FS di non ter dubidado “en chegar a un acordo de renovación con Jozi, na que será a décimo cuarta tempada da porteira defendendo as redes das Guerreiras Laranxas con éxito”.
E é que Jozi viviu todos os grandes momentos deste equipo sendo parte fundamental dos seus éxitos: 4 Campionatos de Liga, 4 Supercopas, 5 Copas de S. M. a Raíña e 6 copas Xunta. O equipo tamén alcanzou o pasado mes de decembro a vitoria no Futsal Women’s European Champions, a Champions League do fútbol sala feminino onde participaban as campioas das principais ligas europeas, incluíndo ao Futsal Pescase Femminile italiano e ao Benfica SL portugués.
Os éxitos do equipo da Mariña tamén lle permitiron ser considerado o Mellor Equipo Feminino do Mundo dous anos consecutivos nos Futsalplanet Awards, sendo Jozi Oliveira nomeada a cuarta mellor porteira do mundo na última edición.
Jozi Oliveira: “Somos parte dun club pioneiro na defensa da igualdade laboral”
“Chamamos Orgullo Laranxa ao que sente cando formas parte deste club. Non só polos éxitos deportivos, que nos últimos anos foron moitos e moi por encima do que nós mesmas soñásemos. Ser consideradas o Mellor Equipo Feminino do Mundo durante dous anos seguidos, é tamén Orgullo Laranxa, porque somos parte dun club pioneiro na defensa da igualdade laboral e dos dereitos profesionais das mulleres deportistas”, declaraba recentemente unha emocionada Jozi ao recibir a Medalla Castelao da Xunta de Galicia como representante do equipo, un dos galardóns máis importantes outorgados ao club ata a data.
