Chegou o momento do adeus para toda unha lenda do Pescados Rubén Burela: Jozi Oliveira. A porteira brasileira Jozi Oliveira leva 15 anos defendendo a elástica das Guerreiras Laranxas e gañando título tras título.
Ver esta publicación en Instagram
Joziane de Oliveira, Jozi Oliveira ou simplemente Jozi que é como a coñecen en Burela, despídese do equipo laranxa tras 15 anos defendendo os paus do noso pequeno pero enorme equipo. A porteira internacional carioca, nacida en Chapecó (Santa Catarina) en 1982, pon así punto e final á súa etapa como Guerreira Laranxa.
Falar dos éxitos do Pescados Rubén Burela FS é falar de Jozi Oliveira. A xogadora, porteira internacional na selección brasileira ata o día de hoxe, foi nomeada sete veces mellor porteira do mundo (sendo a primeira porteira do mundo nomeada na lista de mellores xogadoras cando aínda non había categoría de porteiras)
Procedente do Kindermann, equipo no que xoga durante 6 anos (de 2004 ata finais de 2009), 4 anos a fútbol sala e 2 combinando fútbol campo e fútbol sala, a xogadora brasileira aterra, con 27 anos, en Burela en xaneiro da tempada 2009/2010.
Aquel curso o conxunto mariñán viña de ter ascendido e con dous anos de vida e compitía por primeira vez en División de Honra. A partir deste intre, o pequeno club de fútbol sala, que xa contaba cun equipo de categoría masculina en Segunda División, comeza a súa evolución de forma progresiva, gañando a Copa Galicia ese mesmo ano e o seguinte, e a súa primeira Liga e Copa de España dous anos despois, na tempada 2012/2013.
Desde entón o equipo, xunto á que sempre será a súa eterna porteira, Jozi, non parou de cultivar títulos ata o día de hoxe, chegando a ser “Campioas de todo” (Liga, Supercopa, Copa da Raíña e Copa de Galicia) as tempadas 2019/2020 e a pasada 2022/2023 e acumulando un total de 5 Ligas, 6 Copas da Raíña, 5 Supercopas, 6 Copas de Galicia e 1 Futsal Women’s European Champions, todos eles con Jozi Oliveira como porteira titular baixo os paus.
Jozi Oliveira, comprometida coa veciñanza de Burela
Contan desde o club lucense que “ademais dos éxitos deportivos, Jozi Oliveira foi unha veciña máis de Burela durante 15 anos, unha persoa moi querida no pobo e no club, sempre moi comprometida tanto cos e as burelenses, como coa nosa base, especialmente a categoría feminina, onde formou e animou a moitas nenas e nenos, para elas e eles un referente, véndoos medrar e contribuíndo de forma moi notable á súa educación deportiva e psicolóxico-deportiva”.
Lembran desde o Burela que Jozi Oliveira “non só é porteira, tamén é psicóloga. Graduada en psicoloxía pola USC (na que estuda o último curso), conta cun Master en Psicoloxía e Coaching Deportivo, que estudou en a Florida Universitaria de Valencia á vez que defendía a nosa portería”.
“Con gran pesar, despedímonos da nosa porteira, a porteira que sempre será unha lenda en Burela e que sempre será unha máis da nosa Familia Laranxa”, apuntan desde o Pescados Rubén Burela.
O último partido desta lenda burelista será en Vista Alegre, o sábado contra do Ourense OnTime FSF. Todo un duelo de rivalidade galego do futsalfem para que despedir a unha porteira eterna.
