A hispano-brasileira Jozi Oliveira continuará engrandecendo a súa lenda baixo as redes da portería do Pescados Rubén Burela FS. Coa súa renovación, a cancerbeira sumará xa 13 tempadas defendendo as Guerreiras Laranxas.
“Estou moi feliz por seguir na casa. En Burela teño as mellores condicións para seguir gozando do fútbol sala e vivindo o meu soño. É o traballo que me gusta e gozarei do que me queda de tempo mentres o meu corpo e a miña mente mo permitan”, confesaba a experimentada meta internacional, aos seus 39 anos, cuxo éxito se centra “nunha fórmula moi coñecida: coidarse, traballar moito e ser constante”.
Jozi Oliveira, porteira do Pescados Rubén: “Estou moi feliz por seguir na casa. En Burela teño as mellores condicións para seguir gozando do fútbol sala e vivindo o meu soño. É o traballo que me gusta e gozarei do que me queda de tempo mentres o meu corpo e a miña mente mo permitan”
Aínda que Jozi Oliveira xa o viviu todo coas campioas dende a súa chegada en 2009-10, segue coa ilusión intacta en busca de novos desafíos, sempre con ganas de superarse nas filas do Pescados Rubén Burela: “Amo o que fago! Gozo adestrando, xogando, preparándome para as sesións, superándome, competindo… e unha sempre quere máis. Os obxectivos a nivel de resultado non cambian moito, pero a nivel grupal e individual sempre son diferentes e iso motiva moitísimo”.
Jozi Oliveira, cancerbeira do Pescados Rubén Burela: “Gozo adestrando, xogando, preparándome para as sesións, superándome, competindo… e unha sempre quere máis”
Jozi Oliveira é a peza once do Burela por agora
Coa solidez de Jozi Oliveira xa son 11 as pezas do novo proxecto das campioas. Xunto a Ale de Paz, Leti, Jenny, Cilene, Sandra Buzón, Cami, Dany e Elena Aragón, chegan ao Burela as fichaxes das internacionais Irene Samper e Elenita.
A porteira do Burela, Jozi Oliveira, explicaba ao fío da súa renovación: “Os obxectivos a nivel de resultado non cambian moito, pero a nivel grupal e individual sempre son diferentes e iso motiva moitísimo”
Este será o segundo exercicio que comparta responsabilidade coa moza Sandra. Así será a portería laranxa de 2021-22: “Tentaremos mellorar nas dificultades que temos, medrar como porteiras e principalmente axudar o equipo para conseguir os obxectivos propostos”, explicaba a 1 laranxa con humildade.
