Despois dun mes, as Guerreiras Laranxas do Burela poderán volver gozar da emoción da competición. Tras os aprazamentos de Copa da Raíña e de liga á pista de Universidad de Alicante, o Pescados Rubén Burela FS medirase mañá, sábado 22, ao CD Leganés FS na xornada 14, estreando 2022. A cita de Vista Alegre, prevista para as 18.30 horas, poderá seguirse en directo por Live Vuvuzela e rfef.es. A taquilla abrirase ás 17.30 horas.
Desde a segunda praza con 32 puntos, o conxunto de Lucas retomará a emoción sobre o parqué ante o duodécimo clasificado (12 puntos), un rival valente, afeito a unha defensa e presión altas. “Foi unha espera moi longa. Toda unha serie de circunstancias impedíronnos adestrar todas xuntas desde o 23 de decembro e temos moitas ganas de xogar xa. Estamos un pouco nerviosas; esperamos un partido difícil pero o equipo ten recursos para sacar un bo resultado”, explicaba a 1 burelista, Jozi Oliveira, facendo referencia ao descanso do Nadal, a situación Covid e os compromisos coa Selección Española na preparación para o Europeo de Portugal.
Ambos os conxuntos buscarán as boas sensacións e os tres puntos despois de sucumbir ante Ourense, as mariñás coa ida de semifinais de Copa Galicia (3-1) e as madrileñas despedíndose de Copa da Raíña (4-1).
O Burela, mellor Club Feminino, FutsalPlanet Awards
Co regreso da competición, o Pescados Rubén Burela FS pecha unha semana repleta de alegrías, con novos premios colectivos e individuais nos Premios FutsalPlanet: “Foi unha semana de boas noticias. Ao recoñecemento colectivo, ao traballo de club, súmanse os individuais. Estamos moi felices, queremos compartir esta alegría coa nosa afección, volvendo xogar, sendo en casa, e oxalá con tres puntos para seguir traballando ben”, explicaba a meta laranxa.
O conxunto mariñán pechou o ano 2021 conquistando Europa coa Futsal Women’s European Champions co seu décimo título consecutivo, con Liga, Supercopa de España e Copa da Raíña, e abre 2022 repetindo por segundo ano consecutivo como Mellor Club Feminino nos FutsalPlanet Awards 2021.
Ademais, a incombustible capitá, Peque, volve ostentar o segundo posto, como en 2020, como Mellor Xogadora, na lista na que a tamén burelista Emilly ocupa a sexta praza. O metódico traballo de Jozi Oliveira foi recoñecido co cuarto posto como Mellor Porteira.
Por último, o técnico do asturiano Rodiles FS, Julio Delgado, adestrador mariñán nos 6 últimos exercicios compartindo responsabilidades con Iván Cao ‘Lucas’, foi recoñecido como Mellor Adestrador Feminino.
Regreso das internacionais que non entrarán na convocatoria
Peque, Dany, Ale de Paz e Irene Samper xa están tamén de regreso tras o seu dobre compromiso coa Selección Española ante Ucraína (0-7 e 1-3); non entrarán na convocatoria por protocolo COVID-19, pola aparición dun positivo nos test realizados polo servizo médico laranxa antes de unirse á dinámica de grupo.
O Pescados Rubén Burela pode asaltar o liderato e o Poio Pescamar o terceiro posto