José Valle é unha peza imprescindible do CV Arenal Emevé e, por undécima tempada consecutiva, seguirá á fronte do primeiro equipo do club lucense.
Na tempada 2020/2021, as loitadoras estarán de novo ás ordes de Valle, no que será o seu segundo curso consecutivo e cuarto en total na Liga Iberdrola, a máxima categoría do voleibol español.
Vinte anos de unión entre Valle e o Emevé
Este será un paso máis na sólida relación entre o técnico e o Emevé. Primeiro nas categorías inferiores e despois como adestrador das loitadoras, José Valle leva xa máis de vinte anos vinculado ao club lucense.
Tantos anos unidos fan que o equipo sexa xa familia para o adestrador, que admite que “é un honor seguir formando parte da que considero a miña familia. Aínda que pasen os anos, é moi motivante ver como seguimos sendo capaces de formar como persoas e deportistas a moitas mozas que chegan ao club desde nenas”.
José Valle: “É moi motivante ver como seguimos sendo capaces de formar como persoas e deportistas a moitas mozas que chegan ao club desde nenas”
O adestrador sinala como un dos feitos máis relevantes a chegada á Liga Iberdrola e a permanencia, xa que “seguir desfrutando de como medra o equipo á par que elas é a recompensa ao traballo de toda unha estrutura na que quero seguir participando”.
Conseguida a salvación nesta tempada, o seguinte obxectivo será apuntar máis alto na competición de ouro. Ao seu palmarés, que inclúe tres ascensos á primeira división e o subcampionato de España xuvenil masculino no 2009, o técnico quere facer do Emevé un equipo asentado na Liga Iberdrola.
José Valle: “Tendo conseguido o obxectivo, non temos moito máis que pedir”