Salvo sorpresa, o CV Arenal Emevé é equipo de primeira. As loitadoras teñen case asegurada a salvación, pero o seu adestrador, José Valle, aínda non se quere confiar. “Só queda un partido e hai que pensar neses puntos que faltan. Xa haberá tempo para celebralo”, declara facendo un chamamento á calma.
En Lugo xa se respira ambiente de festexos, sempre en contexto COVID-19. Matematicamente, a salvación das lucenses non está sentenciada. Porén, o Algar Surmenor, colista e última vítima do Emevé, está a nove puntos das lucenses.
Ao contrario das galegas, que só teñen a última xornada por disputar, as de Cartaxena teñen aínda catro partidos por diante. O farolillo vermello debe vencer todos os duelos que lle quedan e as galegas perder o último partido para que as colistas as superen e logren elas a permanencia.
Este último duelo das lucenses, en Alcobendas, celebrarase o 6 de marzo. Antes diso, o 27 de febreiro, o Algar Surmenor competirá contra o Madrid Chamberí, polo que o Emevé xogará sabendo xa se teñen a permanencia asinada ou non.
O CV Emevé de Valle depende de si mesmo
Pase o que pase, a salvación lucense depende da actuación do CV Arenal Emevé. E un paso moi importante o conseguiu xa na última xornada, vencendo ao Algar Surmenor.
José Valle abala o excelente partido das súas pupilas neste encontro: “Saiu moi bo partido de principio a fin, en todas as facetas. Sobre todo na concentración do equipo”, declara. Tan ben xogaron as loitadoras, que o adestrador non tivo que solicitar ningún tempo morto en todo o duelo. “Fumos rabuñando puntos en cada rotación. Non me deu sensación en ningún momento de que perigase nada e non tiña sentido parar ao equipo”, apunta neste sentido.
Un escenario moi distinto ao vivido nas xornadas anteriores. As derrotas ante o Sayre e o Sant Cugat foron como unha “xerra de auga fría” en palabras do técnico, que lles fixeron espabilar.
José Valle: “Seguimos dependendo de nós mesmas. A nivel deportivo creo que é o mellor que nos pode pasar”
“Gañando en Menorca dimos un golpe de autoridade e agora gañando a un rival directo seguimos dependendo de nós mesmas. A nivel deportivo creo que é o mellor que nos pode pasar”, recorda José Valle.
No Emevé xa ven a permanencia, algo que “é tremendamente importante” para club e cidade. Despois de ascender ao equipo á máxima categoría tres veces, José Valle declara que esta pode ser a vencida.
Ter un equipo, “feminino ademais”, na Superliga 1 supón “continuar un proxecto que se iniciou hai moitos anos, e aquí, nunha cidade como Lugo, coa cantidade de xente que movemos, é importantísimo”.
Revive o resumo do partido e escoita ás protagonistas aquí:
Ver esta publicación en Instagram
As loitadoras do CV Arenal Emevé escalan un posto e acariñan á salvación
