O técnico do Mecalia Atlético Guardés, José Ignacio Prades, exhibe firmeza cando asegura que o seu equipo non ten nada feito ante o Hypo Niederösterreich na volta da Q2 a pesar do sete tantos de renda cos que parte. “Hai que ter confianza pero non estar confiadas”, resume unha e outra vez o de Petrer, que asegura que “desde que acabou o partido en Austria” non deixou de “insistir niso” ás súas pupilas. “O Hypo vai vir a tentalo de todas as maneiras e a arriscar. Sabemos que é un equipo experimentado, con xogadoras moi veteranas, que se saben manexar neste tipo de partidos”, apunta.
José Ignacio Prades, adestrador do Guardés: “O Hypo vai vir a tentalo de todas as maneiras e a arriscar. Sabemos que é un equipo experimentado, con xogadoras moi veteranas, que se saben manexar neste tipo de partidos”
“Hai que deixar claro desde o principio que vai ser complicado. Hai que traballar desde o primeiro minuto porque xa tivemos un mal inicio alí e temos que tentar que non se repita”, destaca José Ignacio Prades. “A realidade é que o partido se moveu ao redor do tres ou catro goles de diferenza e grazas a un gran final fómonos a sete. Pero sabemos que o resultado foi do mellor que puido pasar e que elas tiveron unha semana para prepararse. Haberá que facer un moi bo traballo se queremos pasar”, engade o adestrador do conxunto galego.
José Ignacio Prades sobre o Hypo: “Creo que estarán máis centradas en nós, en contrarrestarnos e en apuntar onde non estivemos ben para tentar remediar e buscar solucións para a eliminatoria”
Sobre o encontro, o seleccionador español e preparador do conxunto miñoto cre que o equipo centroeuropeo “tentará forzar co que lle funcionou na ida”. Entre esas receitas figura o ataque con sete xogadoras. “É unha opción. Xa o fixeron durante moitos minutos alí”, recoñece José Ignacio Prades. “Pero creo que estarán máis centradas en nós, en contrarrestarnos e en apuntar onde non estivemos ben para tentar remediar e buscar solucións para a eliminatoria”, conclúe o técnico de Petre.
