O técnico José Ignacio Prades será o adestrador do Mecalia Atlético Guardés unha tempada máis, sumando así a quinta consecutiva. O acordo materializouse nas últimas horas e foi posible grazas a unha serie de condicións que o mesmo técnico petrerí debulla: “Un dos factores principais é que a miña familia está moi aclimatada á Guarda e moi ben aquí, ademais únense as boas condicións de traballo que temos e o proxecto deportivo sempre ambicioso”, enumera.
Tras a confirmación da súa continuidade, o adestrador, que celebrará un lustro á fronte do banco guardés, só ten boas palabras para a entidade do Baixo Miño: “Quero agradecer a confianza do club”, recoñece. Neste tempo, xa se viviu baixo a batuta de Prades unha Liga, unha disputa dunha Supercopa ou o fito de alcanzar a terceira rolda da EHF Cup.
A golpe de febreiro e co equipo inmerso entre a Liga Guerreiras Iberdrola e a eliminatoria dos cuartos de final da Challenge Cup, a dirección técnica do club xa traballa en “darlle continuidade ao grupo”, adianta Prades. Un persoal que sufriu unha clara transformación o pasado verán e que ha ir crecendo co paso dos partidos: “Despois do cambio drástico do verán pasado temos que traballar para manter o grupo, xa que está a mostrar boas sensacións e confirmando que ten percorrido”, sinala co obxectivo de sentar as bases do Guardés 2020-2021 canto antes.
Prades está xa pensando xa na campaña 2020-21
O técnico desvela que xa se están mantendo contactos co actual persoal e detectando “onde teremos que reforzarnos”. Prades celebra “a predisposición por parte de todas as xogadoras para seguir no equipo” aínda que non perde de vista o mercado para “cubrir as posicións nas que teñamos baixas, como a xa sabida de Carmen Campos”, apunta. Destas conversacións espérase que haxa novidades pronto e poder manter o groso dun grupo “que ten algo especial”, destaca.
Así, entre presente e futuro vai transcorrendo o día a día no vestiario do Mecalia Atlético Guardés. Sobre a actualidade tamén se pronunciou Prades: “Non podemos botar a vista moi cara a adiante xa que na liga Guerreiras Iberdrola é moi difícil avanzar ao estar todo tan igualado”, lembra, á vez que desexa que o equipo continúe até o fin da tempada “con opcións de meternos en Europa”.
Doutra banda, Prades móstrase cauto e convida a esperar “a ver que depara o sorteo da Copa da Raíña e como se nos dá a eliminatoria de cuartos da Challenge Cup“, que este fin de semana arrincará co partido de ida en Valladolid (12 h, Huerta do Rei).
A Canarias, antes de Europa e a Challenge Cup
O Guardés seguirá esta semana e a próxima un calendario similar: xornada da Liga Guerreiras Iberdrola a golpe de mércores e compromiso dominical coa Challenge Cup. Para empezar, o persoal sairá ás 6 am desde A Guarda en autobús cara ao aeroporto do Porto para, vía Lisboa, chegar ás Illas Canarias. Pola tarde espera duelo na xornada 15 da Liga Guerreiras Iberdrola co Rocasa Gran Canaria de Carlos Herrera (20:00 h insular, Pavillón. Antonio Moreno).
O persoal ao completo estará dispoñible para medirse a un conxunto insular que non vive a súa mellor tempada ao acumular lesións e encadear resultados negativos. Tal é así que o vixente campión de Liga, Supercopa e Challenge Cup é actualmente sétimo con 13 puntos -o Guardés é cuarto con 19- e desde a novena xornada tan só sumou un punto no empate contra o BM Salud Tenerife. As canarias sufriron en mans de Bera Bera, Elche, Granollers, Aula ou Málaga e viron como aos poucos se ían esfumando as súas opcións de repetir título ligueiro.
A pesar dos números, e de que o Guardés xa venceu ao Rocasa na primeira volta (25-18), Prades advirte: “Están a atravesar unha mala serie, pero as malas series acábanse”, alerta o técnico. Ademais apunta que a incorporación da internacional brasileira Jaqueline Anastacio “deulles moito” e que ten “xogadoras moi desequilibrantes que poden marcar as diferenzas”. No persoal conta coa gardameta Silvia Navarro, o pivote ex do Guardés Haridian Rodríguez, a central María González ou a lateral Lissandra Lussón. As internacionais Sayna Mbengue e Paula Valdivia atópanse lesionadas.
Pola súa banda, o adestrador do Rocasa, Carlos Herrera, manifestou que “o partido co Guardés é moi importante para nós. Considero que vai ser unha boa pedra de toque para comprobar se efectivamente estamos a dar pasos cara a adiante como viñemos facendo nos últimos partidos, aínda que o resultado non fose o que quixésemos”.
O técnico lamentou ademais o pouco tempo de preparación do choque de mañá polo contratempo da calima no seu regreso desde Málaga, onde xogaron o sábado: “O partido non o poderemos preparar demasiado ben por culpa do atraso na viaxe de volta desde Málaga, pola incidencia da calima nos voos de regreso á illa, o que só nos deixará un día para preparar o partido”, apunta.
O partido co Rocasa Gran Canaria e o Mecalia Atlético Guardés terá lugar hoxe mércores 26 de febreiro de 2020 ás 20:00 hora insular no Pavillón Antonio Moreno. É un cruce correspondente á xornada 15 da Liga Guerreiras Iberdrola e que será arbitrado por Fernanda Espino e Víctor Navarro. Poderá verse a través de streaming na canle de YouTubo do equipo grancanario:
