O técnico do Mecalia Atlético Guardés, José Ignacio Prades, recoñece que “foi duro perder así en Xixón”, con ese gol de Palomo sobre a bucina. Pero na mente do técnico xa está o partido desta fin de semana na Liga Guerreras Iberdrola (xornada 8) ante o Lanzarote Zonzamas. Será hoxe sábado 6 de novembro ás 21:30 horas no Pavillón Municipal de San Bartolomé (Lanzarote). Arbitrarán o choque entre canarias e galegas as colexiadas Tania Rodríguez e Lorena García, pertencentes respectivamente aos colexicos galego e aragonés. O partido poderá verse ao vivo en liña a través de streaming na canle de Youtube do Zonzamas.
“Analizamos o sucedido e sabemos onde cometemos os fallos para traballar en melloralos. Estamos en proceso e seguro que a derrota serve de estímulo para todo o que vén e para este primeiro envite en Lanzarote”, reflexiona José Ignacio Prades, que considera ao BM Zonzamas “un bo equipo” máis aló da súa situación clasificatoria. “Ten un estilo de xogo moi definido que asume á perfección”, comenta o técnico de Petrer, que avisa: “Será un partido duro e difícil”.
E sobre a acumulación de partidos e repetición de esforzos, o tamén seleccionador nacional réstalle importancia. “O equipo xa sabe o que é competir en Europa e levar ao lombo estas semanas tan cargadas e as mozas novas adáptanse perfectamente. Ademais, a ilusión que xeran estes partidos fan o resto”, conclúe José Ignacio Prades.
O Guardés inicia a súa maratón en Lanzarote sen fiarse do pechacancelas
