O técnico José I. Prades, adestrador do Atlético Guardés, foi nomeado recentemente seleccionador nacional e este mesmo xoves fixo pública a súa primeira convocatoria como preparador das Guerreras. O cadro español xogará a primeira e a segunda xornada da fase clasificatoria para o Campionato de Europa de Eslovenia, Macedonia do Norte e Montenegro do 2022.
Para estes partidos, Prades volve confiar na galega Alicia Fernández, así como na súa xogadora no club do Baixo Miño, Paula Arcos. Ambas competiran xa coa camiseta da Selección nos Xogos Olímpicos de Toquio 2020.
José I. Prades: “Alicia Fernández e Paula Arcos estiveron a un nivel moi alto”
O propio adestrador confesou á Federación que “elaborar esta convocatoria foi complicado, temos xente que xogou pouco, que arrastra problemas fisicos, así que optamos por xogadoras que xa debutaran e que coñecen a dinámica do equipo”.
As xogadoras convocadas deberán estar o 3 de outubro en Antequera, localidade onde o equipo fará o seu debut na fase clasificatoria para o europeo.
A primeira convocatoria de Prades
Este é o listado completo de xogadoras que estarán ás ordes do técnico de Petrer:
- Portería | Silvia Navarro (Rocasa Gran Canaria), Mercedes Castellanos (Costa del Sol Málaga)
- Central | Silvia Arderius (Costa del Sol Málaga), Alicia Fernández (Rapid Bucaresti)
- Lateral Dereito | Almudena Rodríguez (CSG 2018 Bistrita), Irene Espínola (Neckarsulmer), Paula Arcos (Mecalia Atlético Guardés)
- Lateral Esquerdo| Carmen Campos (JDA Dijon Handball), Lara González (Paris 92), Alexandrina C. Barbosa (CSM Bucaresti)
- Extremo Dereito | Carmen Martín (CSM Bucaresti), Maitane Etxeberria (Super Amara Bera Bera)
- Extremo Esquerdo | Jénnifer Gutiérrez (BVB Borussia Dortmund), Soledad López (Costa del Sol Málaga)
- Pivote | Eli Cesáreo (Super Amara Bera Bera), Lysa Tchaptchet (Visitelche.com Elche)
As principais novidades do seleccionador son a pivote Lysa Tchaptchet e Silvia Arderius, Irene Espínola e Carmen Campos na primeira liña, así como Maitane Etxeberria no extremo dereito.
Os retos das Guerreras
O primeiro partido da Selección de Prades será o 6 de outubro ás 20:45 horas ante Eslovaquia. O segundo encontro será o 10 de outubro ante Portugal ás 17:00, hora portuguesa, no Pavilhao Municipal de Paredes. Neste duelo ante as lusas, as xogadoras do Guardés Sandra Santiago e Patrícia Lima estarán previsiblemente no bando portugués.
O técnico confesa sobre os rivais que “non debemos fiarnos deles, é verdade que non están acostumados a estar en grandes eventos, pero ambos son equipos á alza. De Eslovaquia analizamos todos os seus compromisos no último ano e medio, e ante Serbia fixo xa un gran partido. Portugal dispón cada vez de máis xogadoras no estranxeiro e no playoff ante Alemaña xa fixo grandes partidos”.
Prades: “Liquidar estas dúas primeiras xornadas de catro puntos é o obxectivo que nos marcamos”
A isto, o entrenador engade que “liquidar estas dúas primeiras xornadas de catro puntos é o obxectivo que nos marcamos, sobre todo porque isto lle outorgaría ao equipo a seguridade e a confianza que necesita de cara ao Campionato do Mundo de España“.
