O adestrador do HC Deportivo Liceo, José Ares, apuntaba que as aspiracións do club verdibranco nesta competición ligueira son “xogar a final a catro e acadar unha praza que da lugar a xogar a fase de ascenso”. Ares dirixe o equipo senior feminino dun club que é un histórico deste deporte. Din que no Colexio Liceo a patinaxe vai case no ADN do alumnado, e iso acontece tamén, obviamente, entre as rapazas. Non podería ser doutro xeito.
Nas costas do ‘Gordo Ares’ estará a responsabilidade de tentar devolver á elite ás liceístas. Non será a primeira vez que este veterano técnico asume retos de calado. Sabe do compromiso que leva aparellado defender as cores verdibrancas desde o banco. Durante anos adestrou equipos de base e de elite. Pasou polas filas de entidades como o Club del Mar, Ordes ou Compañía de María. E aló pola tempada 1998-99 exerceu como adestrador do Liceo La Paz masculino, aquel ano no que A Coruña contou con dous equipos na máxima categoría estatal de homes.
José Ares, técnico do HC Deportivo Liceo: “Cinco das nosas xogadoras xa teñen experiencia en Ok Liga”
Curtido polo tanto en non poucas competicións, José Ares analiza o grupo que dirixe e explica que é un colectivo “compensado pero escaso. Faltannos dúas xogadoras máis”. Na plantilla do HC Deportivo Liceo hai xogadoras entre os 13 e os 23 anos. Dez anos de diferencia entre a máis nova e a de máis anos. Precisamente sobre a idade das rapazas di Ares que “máis que un impedimento é unha vantaxe”.
Poñendo en valor a bagaxe previa das súas xogadoras, o adestrador galego apuntaba como dato a ter presente: “Cinco das nosas xogadoras xa teñen experiencia en Ok Liga”. O técnico, José Ares, refírese a tres xogadoras de pista e dúas porteiras. “As peques están en franca progresión, sobre todo unha delas, Paula”, destaca a maiores Ares a preguntas de As Nosas.
Primeiro rival do Liceo de José Ares, o HC Borbolla de Martínez Cancelo
O primeiro encontro das liceístas será contra o Borbolla, xusto se miden o primeiro contra o segundo clasificado na competición de Copa. As xogadoras que adestra José Ares, contra as que dirixe Santiago Martínez Cancelo. A cita será o domingo 2 de febreiro ás 13:30 horas na cancha de Monte Alto na que actúa como local o HC Borbolla.
José Ares, técnico do HC Deportivo Liceo: “Afrontamos este encontro con boas expectativas e moitas ganas. Sabemos que non vai ser un partido doado”
Consultado sobre como enfocan o partido, Ares sinalaba: “Afrontamos este encontro con boas expectativas e moitas ganas. Sabemos que non vai ser un partido doado, sobre todo despois dos reforzos de dúas xogadoras do equipo rival. Pero confiamos no espírito de loita e o bo xogo que están a desenvolver as rapazas”.
