Jorge Carreira pon punto e final (polo de agora) á súa carreira co Maristas Coruña. O adestrador non seguirá á fronte do primeiro equipo na próxima tempada 2021/2022, despois de deixar ás coruñesas salvadas na Liga Feminina 2.
Segundo as súas propias palabras, “deixar isto é moi difícil. Marcho por probar unha nova experiencia, porque traballei e formeime para conseguir isto. Non hai nada negativo na marcha, simplemente saiu outra cousa que a día de hoxe apetéceme máis”. Carreira será o adestrador do novo equipo feminino do CD Aridane, de la localidad de Los Llanos de Aridane na chamada ‘Isla Bonita’, é dicir, La Palma. Este equipo de nova creación aínda non ten categoría, pero o coruñés xa adianta que solicitarán praza na Liga Feminina 2, así que cabe a posibilidade de que Carreira volva a casa, pero desta vez como visitante ao fronte do club palmero.
O técnico foi primeiro xogador do equipo do seu colexio, ao que seguiu vinculado co paso dos anos pasando ao corpo técnico e traballando durante a semana nas instalacións escolares. O coruñés recorda o seu paso polo primeiro equipo con “moitísimo vértigo” no inicio, ao herdar ao equipo de Rubi, o anterior adestrador, quen “deixou moi alto a espectativa do eqiupo, do que podían facer as xogadoras e competir como equipo”. No primeiro ano logrouse o ascenso e no segundo a permanencia, todo un éxito para un conxunto colexial.
Jorge Carreira: “Sinto pena porque deixo algo que non queiro deixar, pero por outra parte, estou contento e orgulloso porque a reacción da xente do club foi moi positiva. Así é un pouco máis fácil”
Despois de toda unha vida vinculada ao Maristas, cando se lle pregunta por como se sinte neste momento da súa vida profesional, admite que non hai unha resposta curta. “Sinto moita pena, hoxe no primeiro día de cole os profes e os nenos preguntáronme. Sinto pena porque deixo algo que non queiro deixar, pero por outra parte, estou contento e orgulloso porque a reacción da xente do club foi moi positiva. Así é un pouco máis fácil”, confesa.
Para Carreira, o futuro do Maristas está asegurado
O xa ex adestrador do Maristas Coruña admite que a súa marcha non cambiará o crecemento do club herculino. “O club non terá ningún problema, sobreviviu a todo e ninguén vai cambiar iso. É un cambio, pero tamén terá cousas positivas e seguirá para diante”, declara.
Para el, o máis importante é o grupo de xogadoras, que en principio seguirá case ao completo no seguinte curso, xa que “son elas as que levan isto e as que o guían. O adestrador de turno que veña seguro que tamén o fai moi ben, pero ao final as que mandan e as que conseguiron todo isto foron elas”.
Tendo en conta as circunstancias excepcionais da xa pasada campaña, salvar a posición na división de prata foi un mérito. “Croe que este ano foi moi ben para todo o malo que pasou, pero non quita que non fora moi duro polos tests, as viaxes e o ter que coidarse todas as semanas para non ter problemas e poder xogar na fin de semana”, recorda o técnico.
Jorge Carreira: “Foi un ano esixente, pero como todos os anos aquí en Maristas”
Carreira recoñece que traballar cun club colexial é sempre complicado, polo que esta tempada o seu día a día non mudou excepcionalmente. “A xente que está aquí, as mozas, traballan e veñen adestrar pola noite e logo xogan. Creo que que para elas foi un ano diferente, pero tampouco tanto. Se cabe realizouse un maior esforzo aínda, pero se o tiveramos que calificar como duro, creo que foi por cousas externas e nada cambiou no noso día a día”, recalca. En poucas palabras, foi un curso “esixente, pero como todos os anos aquí en Maristas“.
Jorge Carreira: “O logro foi o traballo de moita xente antes, e gustaríame que todo o mundo teña claro isto”
O traballo finalmente deu os seus frutos, pero o técnico non se esquece de todos os que estiveron antes. “Como lle dixen a toda a xente cando rematou a tempada, creo que non se pode quedar só no que se fixo este ano. O logro foi o traballo de moita xente antes, e gustaríame que todo o mundo teña claro isto”, insiste.
O adestrador admite que é máis fácil destacar ao plantel deste ano, “pero é traballo de moito tempo e o ano que vén non será algo inmediato. É un camiño moi longo e moi lento. Un equipo colexial como nós ten qye ir paso a paso, asentarse na categoría e seguir sendo o que somos que é o que nos levou a onde estamos agora mesmo”, conclúe.
