Jorge González Basanta continuará co seu bo traballo a fronte da primeira plantilla do Viaxes Amarelle FSF para a nova tempada 2020-2021. O técnico viveirense afrontará a súa terceira tempada no club, cun traballo espectacular nas dúas últimas tempadas e o sobresaliente ascenso conseguido nesta última tempada marcada polo parón polo COVID-19, que non impediu cumprir os obxectivos da escuadra herculina.
Basanta é un novo adestrador que comezou a súa aventura no fútbol sala como xogador no Puerto Celeiro FS, onde estivo durante catro tempadas onde deu o salto para o Autos Lobelle de Santiago FS, no que participou no equipo de Segunda División B, adestrado por Santi Valladares.
Abandonando a súa carreira como xogador no ano 2010, dá o salto ao mundo de adestrador levando o banco do Funeraria Apostol de Liga Local na tempada 2010-2011; para posteriormente dar o salto ao Santiago Futsal onde estivo desde a tempada 2011-2012 ata a tempada 2014-2015, nas cales alterno labores de adestrador no equipo xuvenil, equipo de terceira división, así como labores de scouting co primeiro equipo dirixido por Santi Valladares; ademais desde o ano 2011 ata o 2015 foi 2º adestrador, xunto a Mon Barreiro, da Selección Galega Sub 19 Masculina.
Xa no mundo do feminino regresou na tempada 2015-2016 como adestrador do Poio Pescamar FS, na que asinou unha boa tempada deixando ao conxunto podiense na novena praza da Primeira División Nacional Feminina con 39 puntos. A pesar de ter asinada a continuidade no club de Poio, motivos persoais fixéronlle abandonar o proxecto para a tempada seguinte; e motivos profesionais deixáronlle fóra das pistas as dúas tempadas seguintes.
Xa na tempada 2018/2019, Jorge Basanta tomaba as rendas do primeiro equipo do Viaxes Amarelle FSF, no seu regreso á Primeira División Nacional Feminina FS. O técnico de Viveiro collía un equipo moi novo, e que moitos daban por desafiuzado antes de iniciarse a competición; pero o traballo de técnico e xogadoras, permitiu que o Viaxes Amarelle loitase pola permanencia con opcións reais ata lle penúltima xornada de liga; e só a mala fortuna en partidos claves e algunhas lesións privaron ás herculinas do obxectivo da permanencia.
A pesar do descenso de categoría, o técnico viveirense afrontou o reto de devolver ao equipo á elite do fútbol sala feminino na tempada 2019/2020; e tras unha tempada inmaculada onde non cedeu ningunha derrota en competición regular, ademais de asinar ser un dos máis anotadores da competición e o que menos goles recibiu; atopouse co parón da competición no mes de marzo con 6 puntos de vantaxe sobre o segundo clasificado, e un partido menos que estas.
Tras darse por finalizadas as competicións, había que afrontar o reto de xogarche a tempada a unha soa carta co playoff exprés 5 meses despois do último partido; pero o esforzo, tesón e ganas de técnicos e xogadoras acabaron por conseguir a praza de ascenso, e permitirá ás herculinas competir na elite nacional esta nova tempada 2020-2021.
Técnico e club van da man, e é por iso que a renovación foi sinxela e rápida para ambos; onde agora tocará afrontar unha nova normalidade na competición, e unha liga que pode ser entre 18 e 20 equipos; e sen unha data firme aínda de inicio; pero segundo os últimos comunicados da RFEF, podería empezar a finais do mes de setembro.
Desde o club coruñçes quixeron agradecer a Jorge González Basanta “pola confianza depositada no conxunto herculino para dirixir ao equipo nesta nova tempada, e asumir o reto de traballar co Viaxes Amarelle FSF, para que forme un proxecto sólido no máis alto do fútbol sala feminino. Esperamos que sexa unha tempada satisfactoria para ambos, tanto en obxectivos persoais, como de grupo”, reza o club laranxa no seu comunicado.
