Logo do parón competitivo, o fútbol sala Feminino galego xogou o play-off de ascenso á máxima categoría. Valdetires, O Fisgón e Viaxes Amarelle disputáronse o paso á elite. Ese último chanzo competitivo deu como resultado o regreso das da Coruña á Primeira División do Fútbol Sala Feminino da RFEF, que este curso conta así con cinco conxuntos galegos entre as mellores do estado.
Para coñecer o balance que o club herculino fai do ano 2020 falamos co seu adestrador, Jorge Basanta. Con el no banco, as coruñesas ascenderon á elite de novo. O adestrador segue arestora á fronte do corpo técnico do Viaxes Amarelle.
Que balance deportivo fai do 2020?: “Consolidouse o proxecto deportivo”
Jorge Basanta explica que a nivel global, “e dende o punto de vista deportivo, o ano 2020 foi o ano da consolidación do proxecto deportivo do Viaxes Amarelle FSF tras conseguir o ascenso a Primeira División Nacional Feminina FS sen ceder ningunha derrota, en ningún dos partidos oficiais que disputaron as rapazas”.
Matiza que as condicións para a volta a competir “non foron as mellores, pero o equipo soubo reaccionar e cumprir obxectivos; para na volta a elite do futsal feminino, comezar cun proxecto máis asentado para disputar a permanencia”.
O mellor de 2020 foi “o ascenso no play-off e o peor, “a lesión de Martita”
Buscando o debe e o haber do 2020, Jorge Basanta di que o mellor “sen dúbida foi o ascenso conseguido nun play-off disputado un 25 de xullo, e despois de 5 meses sen xogar ningún partido oficial; respondendo sobre a pista cun bo nivel, e fronte a un rival forte”. Mentres que “o peor, o momento máis amargo da tempada, foi a recente lesión de Martita, que a manterá apartada fora das pistas por unha longa tempada”.
Que lle pide o Viaxes Amarelle ao 2021?: “Que nos respecten as lesións”
“Os desexos para este 2021 do Viaxes Amarelle son que as lesións respecten as nosas xogadoras e poder loitar polo obxectivo de manter a categoría na elite do fútbol sala feminino”, apunta o seu adestrador Jorge Basanta.