O duelo de rivalidade provincial entre Viaxes Amarelle FSF e Valdetires Ferrol FSF rematou con triunfo das locais por 5-3. Pero non con satisfacción por parte do técnico das laranxas. Jorge Basanta vía eivas no xogo do seu equipo e, ao final do partido xa estaba pensando en como poñerlles remedio.
Tiña claro o adestrador do Viaxes Amarelle FSF que o cruce coas departamentais do Valdetires non había ser doado pero, aínda así, non se axustou ao que tiñan traballado as coruñesas entre semana. “Sabiamos que ía ser un partido moi disputado e así foi. Xogamos ao que quixo o rival. O noso plan de partido non foi como traballamos”, explicaba o técnico das herculinas.
Ver esta publicación en Instagram
Para Jorge Basanta, “o importante é que sacamos estes tres puntos para adiante sen facer un gran partido. Toca recuperarse. O luns traballaremos aqueles aspectos do partido nos que non estivemos atinadas. Hai que felicitar ao rival xa que fixo un gran partido. Nós temos que seguir traballando xa que ningún partido vai ser doado. Os tres puntos saben ben por como se deu o partido”.
O cruce desta fin de semana recuperaba un partido adiado por positivos en COVID-19 semanas atrás “sabemos da dificultade que teñen os partidos adiados e máis contra un grandísimo rival, o campión actual deste grupo. Da unha moral moi grande gañar estos tres puntos”, apuntaba Jorge Basanta.
O Viaxes Amarelle mantense á fronte da clasificación na Segunda División do fútbol sala feminino da RFEF pero na mente do adestrador das laranxas, hai moito tela por cortar. “Temos que chegar ao último mes de competición en boas condicións. O ano pasado custounos moito por cuestión de lesións. Temos que chegar no noso mellor momento da tempada a ese play-off, pero aínda queda moito, non está nada conseguido nin moito menos. Está todo moi apretado e como pensemos xa no play-off, seguramente non estemos nel”, advirte Basanta.
O Viaxes Amarelle sofre para imporse a un Valdetires Ferrol loitador e tenaz
