O Marín Futsal xa roza a Primera División coas puntas dos dedos. Pero o salto á máxima categoría aínda está a un partido de distancia. As marinenses disputarán esta fin de semana a Fase Final, na que se decidirá o seu futuro. Para as xogadoras, “o ascenso é unha oportunidade de ouro que non poden desaproveitar”, recorda o seu adestrador Raúl Jiménez.
O técnico non leva dirixindo ao conxunto desde comezos de tempada, senón que chegou hai catro meses. Desde entón, o club só coñeceu unnha derrota, en Rodiles (Asturias). Tal e como destaca, botando a vista atrás, “o equipo adaptouse rápido ao que eu pedía, as xogadoras foron tendo claro o que necesitaba delas na pista e o rol de cada unha e a partir de aí medramos pouco a pouco”.
Semana a semana o Marín foi avanzando, ata que o esforzo culminou no partido ante o Valdetires FSF. Galegas e galegas enfrontáronse polo pase á Fase Final, con vitoria para as marinenses tras “unha carreira na que imos medrando e na que notamos que somos cada vez moito mellores”.
Da base a rozar a Primera División
O actual club do Marín Futsal é de nova creación. Esta é a súa primeira tempada competindo baixo este nome, tras a fusión do Ancoradouro, o O Fisgón e a ED Marín. A intención da unión era “ser máis fortes”, algo que sen dúbida lograron, creando un grupo moi competitivo.
“O equipo fíxose con vistas sempre a aspirar a subir e está cumprindo o obxectivo. Coas xogadoras e o plantel que hai sempre se pensou que garantizaba polo menos pelexar polo ascenso”, sinala Raúl Jiménez.
Antes, os clubs que agora conforman o Marín eran equipos que “levan poucos anos formados como club e traballan sobre todo a nivel de base. Contan con moitas escolas deportivas, con nenos e nenas de futbol 11 e futsal. Nunca se deu esta situación”, recalca o adestrador. O sénior feminino chegou coa fusión co Fisgón, que aportou ao conxunto de futbolistas xa formadas por Araceli Otero.
Raúl Jiménez, adestrador do Marín Futsal: “O equipo fíxose con vistas sempre a aspirar a subir e está cumprindo o obxectivo. Coas xogadoras e o plantel que hai sempre se pensou que garantizaba polo menos pelexar polo ascenso”
Duelo polo ascenso entre galegos
O progreso do Marín Futsal ao longo da tempada levouno a disputar a última eliminatoria previa á Fase Final ante o Valdetires Ferrol, un “vello coñecido”, en palabras de Jiménez. O adestrador subliña como “sempre houbo moi bo nivel en Galicia, e os equipos sempre aspiran a ascender. Xa vemos os equipos que hai en Primera División e en Segunda non é menos. Os galegos sempre aspiramos ao ascenso e ultimamente sempre nos toca medirnos entre nós”.
Porén, o técnico prefería ter xogador ante outro rival na anterior rolda. “É verdade que a min, polo sistema de competición, non me gusta enfrontarme a elas, porque xa foron rivais no noso grupo e teño a sensación de que tería sido mellor cruzarnos con outro grupo e que incluso se puidera dar o ascenso dos dous. Con este tipo de formatos de competición ao final teste que matar entre as do mesmo grupo e é unha pena porque o Valdetires quizáis podería estar tamén nesta final”, recalca.
Raúl Jiménez: “É unha pena porque o Valdetires quizáis podería estar tamén nesta final”
Só un dos dous podería clasificarse, e o gran partido do Marín Futsal deulles o pase. “Está claro que despois da vitoria ante o Valdetires, que foi un triunfo que moita xente non se esperaba, saimos moi reforzadas dese partido”, recorda Jiménez.
“Agora mesmo a moral está polas nubes, as xogadoras vense con opcions de ascenso e nótase no ambiente. Nótase moita alegría, intención de ascenso e xa se lle ve nos ollos a todas que queren subir si ou si e saben que este ano pode ser a oportunidade e non a queren desaproveitar”, subliña o adestrador.
Co Joventut no punto de mira
As galegas preparan con normalidade este duelo tan importante. “A estas alturas da tempada case non hai tanto adestramento, hai máis recuperación, que non haxa ningunha lesionada, e sobre todo estudar ao rival, aspectos técnicos e tácticos e pouco máis”, explica o técnico, sobre as súas claves para loitar no play-off.
Este sábado, ás 18:30 horas, terán enfronte ao Joventut D’Elx, xogando en casa como local. “Temos entendido que poderán ter entre 300 e 400 persoas porque é un pavillón grande, polo que vanse sentir moi arroupadas”, explica Jiménez.
No Marín son conscientes da fortaleza física do equipo rival, que se caracteriza a nivel táctico por dúas estratexias de xogo: “con pivotes e balóns ao pivote, que son xogadoras moi fortes físicamente, ou de catro, intentando aproveitar a velocidade das xogadoras polas bandas”.
O adestrador do club marinense destaca que o Elx foi un dos conxuntos máis destacados do seu grupo, e é un club con experiencia na máxima categoría. “Foi un equipo dominador na súa competición. Fixeron un 6-0 no seu último partido, e xa di moito do rival que imos ter enfronte”, apunta.
O Marín Futsal é “unha familia”
Independentemente do que pase na pista este sábado, Raúl Jiménez asegura que desde o momento no que chegou ao club “atopeime cunha familia”. Moitas das xogadoras levan moitos anos xogando xuntas, e mesmo as que foron rivais entre si coñécense desde hai tempo. “Creo que o grupo é unha familia e iso tamén axuda moito no campo”, confesa o adestrador.
Raúl Jiménez: “Gústame que todas entendan o seu rol na pista e que é o que teñen que aportar cada unha”
Por este motivo, o preparador prefire non salientar nomes individuais e explica como “sempre lles digo que o máis importante é o grupo, prefiero ter contentas a 10 xogadoras que a dous”. Con todo, nomes como Ceci, internacional con España, ou Café salientan, pero “teñen que ter claro que son parte dun todo. Ao final aportarán un pouco máis que o resto, pero saben que sen o resto non vale de nada o que aporten. Gústame que todas entendan o seu rol na pista e que é o que teñen que aportar cada unha. A partir de aí iso fai que o equipo como grupo mellore moito e nótase a nivel adestramento e a nivel rendemento”.
En resumo, Jiménez asegura con contundencia que está “moi orgulloso do equipo que teño. Desde que cheguei e en cada partido non atopo nunca nada negativo. Acordome sempre das que menos minutos xogan, agradezo todo o positivismo que aportan, que nunca poñen ningunha pedra no camiño e iso só pode axudar a sumar. Iso é o que quero. Que todas sumen e consigamos o que nos propuximos que é o ascenso”, conclúe.
Raúl Jiménez, técnico do Marín Futsal: “Estou moi orgulloso do equipo que teño. Desde que cheguei e en cada partido non atopo nunca nada negativo. Iso é o que quero. Que todas sumen e consigamos o que nos propuximos que é o ascenso”.
