A xogadora canadense, con pasaporte haitiano, Jessica Fequiere, continuará a próxima tempada nas filas do BAXI Ferrol, ao chegar a un acordo cos dirixentes do club departamental para ampliar un ano máis o seu contrato.
A xogadora Jessica Fequiere foi unha das destacadas do conxunto departamental na pasada campaña, xogando máis de vinte e catro minutos por partidos, nos que anotou unha media de 10,8 puntos e collendo 4,8 rebotes, o que lle supuxo unha valoración de 12,9 por partido.
Jessica Fequiere demostrou a súa polivalencia, xa que tanto podía actuar en posicións exteriores, como ser moi efectiva dentro da zona, o que levou a gañarse o agarimo dos afeccionados. Ademais, tamén demostrou que pode defender tanto a xogadores exteriores como interiores.
Jessica Fequiere leva un lustro en España
Despois de cinco anos en España, nos que xogou tres campañas na liga Feminina 2 e dúas na liga Challenge, a deportista canadense asume o reto de estrearse na liga Endesa, na que tentará colaborar a que o club poida alcanzar a permanencia.
Desta forma, coa renovación de Jessica Fequiere, o equipo dispón de dúas xogadoras para o novo proxecto, tras anunciarse con anterioridade a continuidade de Claudia Soriano.
Campaña de abonados do BAXI Ferrol
Segundo informa o club ferrolá, segue aberta a campaña de abonados para poder renovar ou darse de alta no BAXI Ferrol. Polo momento, renovaron o seu abono 240 persoas, mentres que se produciron 20 altas.
Todas as persoas interesadas poden pasarse pola Taberna Arauxa, en Cantón de Molins 6, de martes a domingo de 12.00 a 14.00 e de 18.00 a 22.00 horas. Tamén se poden facer as xestións a través do correo electrónico abonadosuniferrol@gmail.com.
