“É complicado ascender e manterse nunha liga tan competitiva coma esta; o salto entre Segunda e Primeira é grande e os equipos necesitan reforzarse moi ben. Con todo, nós non nos confiamos, non baixamos os brazos nin viaxamos pensando que vai ser un partido doado pola diferenza na táboa. Non podemos relaxarnos, pode ser un partido trampa” apuntaba Jenny Lores.
De este xeito, a xogadora pontevedresa adevertía da importacia do partido que xogarán as Guerreiras en Bilbao, onde pecharán o seu periplo de 2019 este domingo a domicilio na pista dun novel. O pavillón San Ignacio acollerá a última cita da primeira volta ante o Bilbo FS (12.00 horas), un rival que ocupa a antepenúltima praza, con 6 puntos.
As de Julio Delgado esperarán un favor do Ourense Envialia que xoga na casa do líder. Sempre e cando a pupilas de Morenín gañen ao Futsi a domicilio, e as de Burela fagan o propio ante o Bilbo, as laranxas poderían poñerse a tan só dous puntos do líder e meter presión na loita polo posto de ouro antes do parón.
Optimismo a pesar das baixas importantes
A expedición mariñá partirá mañá ás 14.30 cara terras vascas coa mirada posta no liderato. Dany non poderá participar por molestias nun xeonllo. Tampouco estarán Jane, por trámites burocráticos no seu país, nin Cilene, que hoxe defenderá a Brasil na final da Copa América.
A pesar das baixas tan sensibles, para Jenny Lores iso non é obstáculo: “Fáltannos tres xogadoras importantes, pero hai equipo suficiente para saír a por todas, ademais o regreso de Cristina está axudando moito” advertía a 21 do Pescados Rubén Burela FS, ante un rival que só puido impoñerse ante Penya Esplugues 4-3, (xornada 2) e empatar con Móstoles 3-3, (xornada 8), Burgas 1-1, (xornada 10) e Roldán 2-2, (xornada 13).
Convocatoria Pescados Rubén Burela FS: 1. Jozi, 5. Cristina, 7. Peque, 9. Jenny, 10. Lara Balseiro, 12. Ana Romero, 14. Bea Mateos, 17. Ale de Paz, 19. Luci, 21. Jenny Lores.
Novo chamamento da peche coa Vermella
“Cada vez que recibo unha convocatoria da Selección é unha alegría. Aquí xa estou adestrando coas mellores xogadoras, pero para min é un auténtico luxo poder facelo ademais coa Selección, e o mellor do mellor de España. Vives un grande ambiente, é un privilexio”, así se manifestaba a peche do Burela, Jenny, cunha meta máis por diante coa Vermella, e tamén con Peque, estreando 2020 en Vila Real fronte a Portugal (14-15 de xaneiro).
Ao respecto dos desexos que ten en mente de cara ao ano 2020, a pontevedresa confesaba: “Creo que as incorporacións nos adaptamos moi ben ao equipo e ao sistema e só quero seguir traballando así e aprendendo para chegar a ser unha xogadora importante”.
