A americana Jenna Allen defenderá por segunda tempada consecutiva a camiseta do BAXI Ferrol despois de chegar a un acordo co club para renovar o seu contrato.
A xogadora, de 23 anos e 1.90 metros, foi unha das máis destacadas do equipo ferrolán na pasada campaña na LF2, na que foi a segunda que máis minutos disputou, a terceira en anotación, con máis de once puntos por partido, e a mellor reboteadora, con máis de seis capturas por encontro.
Jenna destaca por ser moi versátil, xa que tango pode xogar en posicións interiores, cun gran traballo no xogo de costas, como lanzado de tres puntos, cunha boa porcentaxe de acerto.
A xogadora destaca sobre os motivos que lle levaron a aceptar a oferta de renovación que “decidín regresar a BAXI Ferrol porque amaba o traballo do adestrador Lino e das miñas compañeiras de equipo e, especialmente, o apoio dos fans”.
Jenna Allen, xogadora do BAXI Ferrol: “Decidín regresar a BAXI Ferrol porque amaba o traballo do adestrador Lino e das miñas compañeiras de equipo”.
En canto ao que espera da próxima campaña, a pivote manifesta que “estou emocionada pola próxima tempada, porque non puidemos terminar a última e este equipo ten un gran potencial, debido ao talento e á ética de traballo que temos”.
Sobre o que pode achegar ao equipo ferrolán, Jenna sinala que “xunto coa miña habilidade de xogar no poste e lanzar desde fóra, espero achegar unha actitude positiva e moita enerxía ao equipo”.
Jenna Allen, xogadora do BAXI Ferrol: “Xunto coa miña habilidade de xogar no poste e lanzar desde fóra, espero achegar unha actitude positiva e moita enerxía ao equipo”.
Jenna Allen convértese na undécima compoñente do persoal ferrolán para a próxima tempada, tras as renovacións de Patri Cabrera, Natalia Rodríguez, Sune Swart, Patricia Benet, Anniina Aijanen e Dynn Leaupepe e as fichaxes da valenciana Irene Garí, das arxentinas Andrea Boquete e Julieta Mungo e da canaria Laura Fernández.
