O técnico do Conservas Orbe Rubensa BM Porriño, Ismael Martínez, destacou na previa do cruce a ilusión que xera este encontro: “é un partido que levamos dous anos esperando. É un encontro moi complicado, porque elas na súa casa son moi fortes, só hai que ver os seus resultados. Temos moita ilusión de poder puntuar e de que sexa unha festa do balonmán”.
En relación á última vitoria na Supercopa Galicia, o técnico cre que non se deberían guiar por ese resultado “non podemos coller de referencia o partido da Supercopa, por motivos como que elas viñan de xogar o día anterior e faltáballes xente, igual que a nós” e sinala que esta segunda xornada será diferente, “creo que vai ser un partido distinto, oxalá se parecese ao da Supercopa porque a nós viríanos ben, pero entendemos que temos que facer as cousas mesmo mellor para para poder gañar”.
Ismael Martínez agarda un partido diferente ao da Supercopa de Galicia: “Oxalá se parecese porque a nós viríanos ben, pero entendemos que temos que facer as cousas mesmo mellor para para poder gañar”
Ismael Martínez tamén sinalou o bo inicio que tiveron as xogadoras que adestra José Ignacio Prades na primeira xornada da liga: “Veñen de facer un partido moi bo en Valladolid. Un partido moi serio cun equipo moi traballado e con poucas perdas de balón. Paula Arcos fixo moitísimos goles, sendo moi vertical e decisiva, Lima estivo a un nivel moi bo e Pessoa achegou moitísimo no lateral dereito. Defensivamente Estefanía Descalzo é unha peza fundamental para elas, é unha moi boa defensora”, apuntaba o adestrador do Conservas Orbe Rubensa BM Porriño.
Ismael Martínez, pendente do equipo de Prata para a convocatoria
En canto á lista de xogadoras coas que contará o Conservas Orbe Rubensa BM Porriño, o técnico, Ismael Martínez, explicou: “hai que ver que como facemos a convocatoria xa que debuta Prata e temos moitas esperanzas postas nese equipo. Este ano teñen que loitar por tentar estar entre os primeiros postos”.
Ismael Martínez relataba na previa do choque co Mecalia Atlético Guardés que as de Porriño esperan que o derbi do balonmán feminino galego “sexa un partido bonito, que fagamos gozar á xente e, sobre todo, tentar ser máis competitivos. O equipo chega moi ilusionado, están a traballar moi ben desde o primeiro día. A verdade que é un día para para medirnos un pouquiño e ver se somos capaces de puntuar alí”, sinalaba o adestrador das visitantes.
Isma Martínez: “Queremos que sexa un partido bonito, que fagamos gozar á xente e, sobre todo, tentar ser máis competitivos. O equipo chega moi ilusionado, están a traballar moi ben desde o primeiro día. A verdade que é un día para para medirnos un pouquiño e ver se somos capaces de puntuar alí”
Este derbi do balonmán feminino galego na máxima categoría estatal disputarase o sábado 18 de setembro a partir das 20:00 horas no Pavillón guardés da Sangriña coa arbitraxe dos colexiados José Carlos Frieira e Jesús Álvarez (Asturias). O encontro, que contará con público no recinto deportivo, poderá tamén seguirse en directo a través da canle TVG2.
José Ignacio Prades: “Un derbi sempre é motivo de alegría e logo de tanto tempo, máis”
