O adestrador do Conservas Orbe Rubensa BM Porriño, Ismael Martínez, dirixe ao primeiro equipo da entidade que milita na máxima categoría do balonmán español, a Liga Guerreras. O equipo feminino é o referente desta entidade deportiva galega que naceu no ao 1987 e que ten o traballo coa base moi presente como se infire das palabras do técnico do primeiro equipo.
No balance do 2020, Martínez destaca “a estabilización do filial en prata”
Cando pensa nun balance do ano 2020, o adestrador do Conservas Orbe Rubensa BM Porriño, Ismael Martínez, pensa en modo club e en futuro. Neste sentido a súa mirada non se centra so no primeiro equipo da entidade e ten en mente á base. “A nivel club estamos moi contentos porque, a verdade é que fomos quen de estabilizar ao equipo filial en prata e a base non deixou de aumentar, tanto en calidade como en número”, di o técnico das galegas.
“En canto ao primeiro equipo”, engade Ismael Martínez, “a verdade é que non podemos estar satisfeitos porque os resultados non foron os que esperabamos. Este ano colle a metade da tempada pasada, pero non foi a desexada. Neste inicio de Liga creo que, para estar satisfeitos, deberiamos levar dous puntiños máis mínimo”.
O mellor do 2020, “a estabilidade do club”, e o peor “a incerteza”
Ismael Martínez apunta que o mellor do ano 2020 no Conservas Orbe Rubensa BM Porriño foi “a estabilidade do club, a familiaridade que ten e manter a plantilla, a maioría de xogadoras”. E consultado polo peor apunta a unha das consecuencias da pandemia: “Creo que foi a incerteza dos ascensos e descensos polo virus, que nos tivo en vilo moitísimo tempo e limitou, en gran medida, a planificación de cara a esta tempada”.
Que lle pide o equipo ao 2021?: “Poder sacar máis xogadoras do filial”
Nas aspiracións para este ano 2021 que acaba de comenzar, Ismael Martínez separa as arelas do primeiro equipo das do club en si mesmo. Así, como primeiro equipo, explica que a aspiración “ten que ser máxima: meterse entre os catro primeiros do noso grupo e xogar polo título. Logo, sobre todo, pasar esta rolda de Copa e meternos nunha fase final, que xa fai uns anos que non estamos entrando”.
E a nivel club, considera que se debe aspirar a “ser capaces de manter o traballo coa base, que non está a ser sinxelo, sobre todo pola situación actual; manter o equipo en prata e dar un paso máis e seguir sacando xogadoras, que ao final é a identidade deste club”.
