O Conservas Orbe Rubensa BM Porriño, adestrado por Isma Martínez, puxo punto e final a unha primeira metade de Liga Guerreras Iberdrola un tanto descafeinada. O conxunto do Baixo Miño iniciaba no pasado mes de setembro unha ilusionante campaña na que a fichaxe de Haridian Rodríguez era recibida coma auga de maio nun conxunto en procura de aumentar o seu teito competitivo.
Non obstante, a inconsistencia de xogo e resultados provocou que as aspiracións iniciais moi cedo se transformaran na meta de garantir a permanencia un ano máis na máxima categoría do balonmán feminino.
Repasamos co seu técnico, Isma Martínez, a actuación do conxunto nesta primeira volta e os e as novas metas de cara o peche da tempada.
As Nosas: Finalizada a primeira volta co equipo en novena posición e dez puntos no casilleiro. Como valora o adestrador a actuación do equipo ao ecuador do campionato doméstico?
Isma Martínez: A valoración global é clara, non estamos contentos, sobre todo por ter caído na Copa da Raíña nunha eliminatoria que tiñamos moi de cara. A valoración non pode ser positiva, aínda que é certo que pasaron moitas cousas, hai problemas, pero creo que este equipo ten que aspirar a un puntiño máis, non só a efectos clasificatorios senón tamén a nivel de sensacións, competir un chisco máis con algún rivais. Creo que ninguén está satisfeito e estamos traballando para que esta segunda volta sexa distinta.
A.N: Con só 2 vitorias como visitante en toda a primeira volta crees que o equipo debe facerse máis forte lonxe do Municipal?
Isma Martínez: Si, aínda que tamén foi unha cuestión de calendario, tivemos saídas moi complexas como a de Málaga, Canarias, A Guarda… Son saídas nas que contas que pode ser que non puntúes, pero coido que debemos estar un puntiño máis preto de facelo. É unha cuestión máis de competitividade que de puntos, como dixen, hai pistas nas que é moi complexo puntuar, o calendario foi duro pero non podemos estar tan lonxe como foi o caso de Valladolid. Podemos non puntuar pero debemos estar un punto máis competitivos.
Isma Martínez, adestrador do BM Porriño: Hai saídas nas que contas que podes non puntuar, pero coido que debemos estar un putiño máis preto de facelo. É unha cuestíón máis de competitividade que de puntos.
A.N: Sen embargo semella que na casa as actuacións son máis consistentes, o Porriño é, por exemplo, o único equipo que conseguiu rabuñarlle un punto ao líder.
Isma Martínez: Creo que na casa tamén se nos escaparon puntos que fixemos mérito para gañar. Sobre todo en partidos que tíñamos controlados como Gijón, Elche ou Bera Bera. Creo que os tiñamos francos para ganar, e logo no partido de Sant Quirze penalizounos unha mala primeira parte e coas presas sacamos un punto que ben puideron ser os dous ou ningún. Creo que nos falta un punto de solidez para pechar este tipo de encontros.
Isma Martínez: “Creo que na casa tamén se nos escaparon puntos que fixemos mérito para gañar”
A.N: No apartado estatístico, o BM Porriño é o oitavo equipo máis goleador pero o terceiro que máis tantos recibe. Crees que de cara a segunda volta se debe aumentar a solidez defensiva?
Isma Martínez: Si, aínda creo que esta estatística é un tanto enganosa porque hai partidos que estamos moi ben en defensa, somos un equipo que se constrúe desde atrás a partir dunha gran defensa, pero logo hai partidos nos que concedemos moitos espazos. Creo que é un dato irregular porque hai partidos nos que encaixamos poucos goles e outros nos que nos desangramos. Hai moito contraste, nótase moito cando non estamos ben atrás e nótase en todo o rendemento do equipo, neses días temos que detectar os momentos de fraqueza e non desangrarnos máis. Esta estatística depende moito do partido, estamos sendo irregulares no partido a partido e ás veces, incluso dentro dun mesmo encontro.
A.N: Falando de estatísticas, Haridian Rodríguez, asinada no pasado mes de agosto, é ao peche da primeira volta a segunda máxima anotadora da categoría. Como foi o impacto de dispor dunha xogadora do seu nivel?
Isma Martínez: Sabíamos que Haridian era unha fichaxe estratéxica para transmitirlle ao grupo a súa profesionalidade. É un exemplo, unha xogadora que a pesar da súa idade e de todo o que xa gañou dá gusto vela adestrar e esa era a actitude que queríamos que se vise reflectida nas nosas xogadoras máis novas. O seu impacto, máis alá dos goles, é moi bo e agardamos que sexa un exemplo que se transmita a moitas xeracións.
Isma Martínez, adestrador do Porriño: “Sabíamos que Haridian era unha fichaxe estratéxica para transmitirlle ao grupo a súa profesionalidade. É un exemplo, unha xogadora que a pesar da súa idade e de todo o que xa gañou dá gusto vela adestrar e esa era a actitude que queríamos que se vise reflectida nas nosas xogadoras máis novas”.
A.N: No noveno posto, sen ter que competir na Copa e cunha marxe relativamente cómoda sobre os postos vermellos. A que debe aspirar o equipo nesta segunda volta?
Isma Martínez: Logo da eliminación de Copa fixemos unha longa reflexión e entendemos que nos estábamos obsesionando un pouco co obxectivo do oitavo posto, que ten moitas vantaxes xa que es cabeza de serie na vindeira edición da copa, xogas a volta na casa, saltas unha eliminatoria e como vemos nos últimos anos soamente están entrando estes equipos, polo que entendemos que a clasificación na Liga nos daría esa vantaxe no futuro. Despois de sentarnos a reflexionalo todo con moitísima calma entendemos que nos está a pesar moito ese obxectivo e agora só nos centramos en sacar o máximo de puntos posibles e que a clasificación sexa quen decida onde nos situamos. Pensamos na semana a semana.
Isma Martínez, adestrador do Conservas Orbe Rubensa Porriño: “Logo da eliminación de Copa fixemos unha longa reflexión e entendemos que nos estábamos obsesionando un pouco co obxectivo do oitavo posto”
