Disciplinada, traballadora e cunha calidade incrible, pero é que ademais demostrou un compromiso ao 100% coa escuadra herculina; e tras devolver ao Viaxes Amarelle á elite do fútbol sala feminino, Irune Santesteban abandona a disciplina herculina para centrarse nos seus estudos, que a obrigan a desprazarse fóra da nosa comunidade autónoma.
A xogadora navarra chegou á escuadra herculina na tempada 2018/2019, cando o equipo regresaba á Primeira División Nacional Feminina, e foise gañando un posto no equipo, como unha das súas xogadoras destacadas; pero unha lesión no seu xeonllo no mes de febreiro, impediulle terminar a tempada co primeiro equipo.
A pesar de que o equipo descendeu ao final da primeira tempada no club, e a navarra tivo ofertas doutros clubs, Irune Santesteban decidiu renovar o seu compromiso co club herculino e apostar todo para que o Viaxes Amarelle regresase de novo á categoría de ouro do futsal.
Nesta tempada, a xogadora forxouse a si mesma como un pilar determinante dentro do equipo e asumiu un rol de importancia dentro do cadro dirixido por Jorge Basanta. A navarra destacou nos momentos craves, e sendo protagonista no partido do playoff de ascenso á Primeira División contra o Valdetires Ferrol, onde anotou dous, dos tres, goles que sumaron as herculinas no seu marcador, e terminaron por valer un ascenso á elite.
Desde o Amarelle quixeron trasladar “o enorme agradecemento a Irune Santesteban, polo seu compromiso co club durante a súa estancia no mesmo, achegando ganas, ilusión e un gran corazón laranxa”.
