Para a vindeira tempada, o Dépor ABANCA perde a unha das súas capitás. Iris Arnaiz non seguirá defendendo as cores branquiazuis no curso 2021/2022.
Nunha emotiva mensaxe en redes sociais, en galego e castelán, a xogadora asturiana despídese da afección asegurando que “isto non é un adeus, é un ata logo… porque quero que teñades claro que #voltarei”.
A despedida de Iris Arnaiz
Arnaiz, que superou o centenar de partidos como deportivista, e foi titular en 32 dos 33 encontros disputados na pasada tempada, despídese da que foi a súa casa nos últimos catro anos.
“Nunca serei capaz de expresar o que sentín e o que sinto nunhas liñas O meu círculo máis achegado sabe que non foi unha decisión fácil. Este ano foi moi difícil e nunca pensei que tería que tomar esta decisión”, comeza explicando a futbolista.
Iris Arnaiz non seguirá vinculada ao Dépor ABANCA, unha decisión que lle “rompe o corazón”, pero que considera necesaria “para seguir mellorando” e aumentando o nivel de esixencia. “Ver cal é o noso límite”, resume.
Iris Arnaiz: “Sempre dixen que non era deportivista, pero dende o minuto un que tiven a oportunidade de levar estas cores e este escudo, souben que este era o meu sitio”
Botando a vista atrás, a xa excapitá branquiazul recorda que “foi unha honra e un privilexio representar a este club e un soño ser unha das capitás. Sempre dixen que non era deportivista, pero dende o minuto un que tiven a oportunidade de levar estas cores e este escudo, souben que este era o meu sitio. E agora son unha deportivista máis”.
Ver esta publicación en Instagram
Na súa carta de despedida, a centrocampista quixo agradecer o apoio recibido estes anos por todos os traballadores do club “que fan posible que nos poidamos sentir profesionais”, aos seus “pais en Galicia: Pablo e Belén”, ao corpo técnico, e ás súas compañeiras, das que asegura que “grazas a elas convertinme no que son hoxe. Foi un luxo e un privilexio compartir campo e vestiario con vós”.
Facendo alusión ao sentimento de grupo, Arnaiz declara que “O #UnÚnicoLatido remata, pero no meu corazón non deixará de latexar”.
Iris Arnaiz: “O #UnÚnicoLatido remata, pero no meu corazón non deixará de latexar”
Por último, a xogadora diríxese á afección, da que agora ela mesma forma parte, afirmando que “sempre serei unha máis. Vivirei cada vitoria, cada gol, cada logro coma se fose meu”.
A asturiana, que debutou coa elástica do Dépor ABANCA en setembro do 2017, nun partido ante o Gijón FF, subliña que “nunca esquecerei todos os momentos que psamos, o primeiro partido en Primeira, a Copa en Riazor, o partido no Johan, o ascenso…”.
Arnaiz, da que aínda non se coñece destino, pero conta con propostas da Real Sociedad ou do Sevilla, asegura que algún día regresará a Abegondo: “Quero que teñades claro que #VOLTAREI”.
Coa súa marcha, o Dépor ABANCA perde a xogadora que disputou máis minutos sobre o verde na pasada campaña, achegándose aos 3.000 minutos.
