O Dépor ABANCA está vivo e coleando. Malia ser colista, a liña de salvación está a dous puntos e aínda quedan 13 partidos por diante. Por iso, unha das súas capitás, Iris Arnaiz, móstrase tranquila ante o que resta de tempada e confiante no xogo das súas compañeiras.
Nas próximas semanas, o conxunto branquiazul ten por diante encontros ante rivais máis directos, como o Rayo Vallecano ou o Logroño, e outros de maior nivel, como Real Madrid, Atlético de Madrid ou Barcelona. Pero isto non amedrenta ás galegas, convencidas conxuntamente das súas capacidades para permanencer unha tempada máis na Liga Iberdrola.
O primeiro asalto será ante o Rayo, nun partido no que, en palabras de Iris Arnaiz, as herculinas “iremos a morder desde o minuto un. O temos todas interiorizado”.
Así ve Iris ao Rayo, e así considera que poden gañar
Esta será a seguinte ocasión para saír do pozo, xogando ante as madrileñas, que xa venceron na recuperación do partido de ida hai un par de semanas.
Neste primeiro enfrontamento o Dépor ABANCA caeu por un 3-1, malia competir duramente na primeira metade do encontro. Para este novo duelo, Iris Arnaiz considera que o partido desenvolverase de maneira moi distinta, “xa só polo tipo de terreo de xogo”.
Tal e como explica a capitá, en Abegondo xogarán con herba natural, algo ao que as madrileñas non están acostumadas.
O Dépor ABANCA sucumbe ante o Rayo Vallecano na segunda metade 3-1
En palabras de Arnaiz, o cadro visitante ten como punto forte o seu plantel. “Teñen xogadoras, xa o dixen hai dúas semanas, que igual non son moi coñecidas ou potentes, pero como equipo é dos máis difíciles de ganar na categoría e xa se leva vendo nos últimos anos”, analizaba en rolda de prensa.
Porén, na convocatoria desta nova xornada hai importantes ausencias no Rayo. Por iso, a central considera que este feito será un punto a favor das deportivistas. “As baixas que teñen, ou deberían ter porque non están na convocatoria, creo que psicoloxicamente nos van vir ben, porque son xogadoras importantes para elas e que poden entrar bastante en xogo”, asegura.
Iris Arnaiz: “Xogamos en casa, coa nosa xente e sabemos que temos que gañar”
Outro aspecto importante será xogar en casa, e facelo ante a afección. “Xogamos en casa, coa nosa xente e sabemos que temos que gañar e iremos a morder desde o minuto 1, o temos todas interiorizado”, declara. Todo isto son factores que, segundo a futbolista, para lograr a vitoria “teremos que ter en conta e xogar o noso partido, ter o balón e chegar o máximo posible a porta”.
A 12ª xogadora, na bancada
Precisamente sobre a importancia de sentir o alento do público en Abegondo, a xogadora declarou que é algo diferencial. Así foi no partido ante o Sporting de Huelva, no que as futbolistas do Dépor ABANCA coinciden en que a presencia da afección foi fundamental para sumar os tres puntos.
Iris Arnaiz: “Ese partido (contra o Huelva) o gañamos grazas á afección”
“Creo que ese partido o gañamos grazas á afección, porque sempre que perdiamos o balón ou tiñamos unha oportunidade a xente apoiaba e sacas forzas de onde non sabes onde”, reflexiona Arnaiz.
A capitá recoñece que as últimas semanas pasáronlle factura fisicamente ao equipo, e acumulan moito cansancio, polo que a nivel anímico, o apoio da afección “da un plus brutal e creo que vai ser importantísimo o público esta semana en Abegondo“.
A análise da capitá do partido ante a Real Sociedad
A este partido chegarán da derrota colleitada ante a Real Sociedad. Un partido no que as branquiazuis non se levaron os tres puntos, pero si leccións para seguir mellorando.
Segundo Iris Arnaiz, un dos aspectos máis positivos deste encontro en terras vascas foi “que non nos meteran gol nos primeiros 40 minutos”. O escenario mudou na segunda metade, cando “non tivemos tantas ocasións”, pero a conclusión que saca a xogadora é que “podemos enfrontarnos a calquera rival”.
Iris Arnaiz: “O compañeirismo se está notando e é o que nos vai axudar a saír de aí abaixo”
O mellor aspecto que se viu sobre o terreo de xogo foi a actitude do equipo, segundo a súa capitá. “En ningún momento baixamos os brazos e tivemos oportunidades de igualar o marcador. Á vez que ías a presionar a unha ía unha compañeira a axudar. Nas axudas tanto nas disputas a actitude foi outra e o compañeirismo se está notando e é o que nos vai axudar a saír de aí abaixo”, asegura.
Tranquilidade para afrontar o tramo final e lograr a salvación
Iris Arnaiz non ten dúbidas de que o Dépor ABANCA será un ano máis equipo de Primeira. No conxunto galego aínda non fan contas mirando aos datos do descenso.
“Mentres teñamos nas nosas mans saír de aí e manter a categoría non imos botar contas. O que temos que ter é tranquilidade, conseguir os puntos que temos que conseguir contra os rivais directos e a partir de aí xa se verá todo”, sentencia.
A central branquiazul non está de acordo coas voces que aseguran que este tramo final de tempada será complicado para o Dépor ABANCA.
A futbolista sinala que aídna quedan 39 puntos en xogo, “a maioría son rivais directos que xogan na nosa casa. Se facemos o que temos que facer, imos estar salvadas este ano. Non sei porque a xente di que é moi difícil, sabemos a situación na que estamos, pero teñen que vir moitos equipos a casa”, recalca.
A posición actual, como colistas, non é a máis favorable, e Arnaiz recoñece que “nos primeiros partidos non estivemos á altura da competición, pero creo que agora si o estamos demostrando e temos que ir a por todas”.
Iris Arnaiz: “Quero transmitir é tranquilidade ás miñas compañeiras, corpo técnico e afección, porque vai ser difícil, pero creo que o imos conseguir
Nesta liña, a futbolista mostrouse firme: “Estou convencida de que nos imos salvar. O que quero transmitir é tranquilidade ás miñas compañeiras, corpo técnico e afección, porque vai ser difícil, pero creo que o imos conseguir”.
“Creo que estamos bastante preparadas, tanto fisicamente como psicoloxicamente. Animicamente imos con todas a ganar ao Rayo o sábado que é o que necesitamos”, conclúe.
