Outro nome galego soa para Toquio 2021. A coruñesa Iria Jarama ven de ser quinta na final B do Campionato de Europa Absoluto de Varese (Italia) de remo coas súas compañeiras do catro sen temoneiro español, undécimas na clasificación xeral. Esta embarcación, formada tamén por Aitzpea González, Victoria Cid e Nuria Puig, xogarase do 16 ao 18 de maio ne Lucerna (Suiza) unha praza para os Xogos Olímpicos.
“Estou moi orgullosa do gran equipo que formamos e de todo o que damos de nós cada día”, comentaba a deportista nunha publicación no seu perfil de Instagram á fin do Europeo. Jarama e as súas compañeiras foron sextas na súa serie nas eliminatorias, cun tempo de 7:18, quedando por detrás de Países Baixos, Gran Bretaña, Dinamarca, Romanía e Polonia.
Na repesca o resultado foi mellor, quedando quintas cun tempo de 6:55, só por detrás de Gran Bretaña, Romanía, Ucraína e Francia. Tamén foron as quintas mellor clasificadas na final B, cunha marca de 7:01, por detrás de Ucraína, Dinamarca, Polonia e Francia.
Iria Jarama: “Remamos o noso segundo Europeo como absolutas, un paso máis”
Jarama salientaba en redes sociais a importancia de ir paso a paso. “Como sempre me dicían en casa, sen unha boa base ningún edificio pódese soster. Aprender é o que fai que pouco a pouco vaiamos dando forma a esa base, e así acabemos construíndo algo máis grande. Rematamos o noso segundo Europeo como absolutas cun paso máis dado cara diante”.
Ver esta publicación en Instagram
Tamén representando a España competiron Aina Cid e Virgina Díaz no dous sen temoneiro, conseguindo a medalla de bronce. Cun tempo de 7:03.75, as españolas só quedaron por debaixo de Gran Bretaña e Romanía e acadaron a única medalla para o equipo español.
