A coruñesa Irene Martínez será unha das representantes da Selección Española de halterofilia no Campionato de Europa Absoluto 2021 de Moscú. O torneo celebrarase entre o 3 e o 11 de abril. En total, o equipo estatal conta con 16 deportistas entre as que tamén está a olímpica leonesa Lydia Valentín.
Martínez, competidora do CH Coruña, está inscrita na categoría de 59 kg e vén de lograr o bronce na Copa de España. Co torneo de Moscú, este será o seu sexto campionato europeo. No seu palmarés inclúese o bronce de Bucarest 2018, onde competiu en 63 kg. O seu compañeiro de club, o haltera coruñés Víctor Castro, competirá na categoría masculina 67 kg.
Presentación de Irene Martínez e o resto do equipo no CSD
Antes de viaxar ata Rusia, Irene Lozano, secretaria de Estado para o Deporte e presidenta do Consejo Superior de Deportes (CSD), despediu aos integrantes da Selección Española.
A presidenta do CSD destacou a importancia deste tipo de campionatos, xa que supoñen “a volta a unha certa normalidade despois dun ano moi complicado. Foron uns meses moi difíciles onde tivemos que xestionar a incertidume, pero non hai broche mellor que poder veros competir de novo”. Lozano mostrou o seu orgullo polos deportistas e destacou os seus éxitos, ademais de agradecer á Real Federación Española de Halterofilia o seu traballo.
Neste acto só puideron estar presentes sete halteras (entre eles Irene Martínez) do equipo español, os que residen e adestran no CAR de Madrid, seguindo os protocolos sanitarios.
A convocatoria ao completo
Categoría feminina:
- Olga Fernández – 49 kg
- Atenery Hernández – 55 kg
- Irene Martínez – 59 kg
- Mouna Scandi – 59 kg
- Garoa Martínez – 64 kg
- Ilia Hernández -71 kg
- Lydia Valentín – 76 kg
Categoría masculina:
- Josué Brachi – 61 kg
- Acorán Hernández – 67 kg
- Víctor Castro – 67 kg
- David Sánchez – 73 kg
- Alejandro González – 73 kg
- Andrés Mata – 81 kg
- Alberto Fernández – 81 kg
- Marcos Ruiz – 109 kg
