A cidade de Sofía acolleu o Campionato de Europa Absoluto de Halterofilia (EWF). Na cita estiveron dous galegos do CH Coruña: Irene Martínez, que saía dunha lesión, e Víctor Castro. A representación española foi de 13 halteras: 7 deportistas femininas e 6 deportistas masculinos.
No caso de Víctor Castro competiu neste Campionato de Europa na categoría de peso corporal de -67 kilos, mentres que a coruñesa Irene Martínez fíxoo na de -59 kilos. Ambos os dous deportistas competiron na quenda do grupo B das súas respectivas categorías.
Irene Martínez viaxaba á capital búlgara aínda moi pendente da evolución da recuperación da súa lesión de cadeira. No mes de decembro a haltera galega lesionábase na Copa do Mundo de Catar. A deportista coruñesa acusou a falta de preparación, froito da convalecencia da lesión de cadeira. Irene Martínez só acadou realizar o primeiro dos seus tres intentos tanto en arrancada como en dous tempos.
Neste Campionato de Europa Absoluto de halterofilia, Irene Martínez rematou a competición en 15º lugar nas tres modalidades, arracada, dous tempos e total olímpico. De feito, unicamente fixo o primeiro dos tres intentos en arrancada e en dous tempos.
Ver esta publicación en Instagram
Lonxe das súas mellores marcas persoais, Irene Martínez asinou 83 kg en arrancada, 94 kg en dous tempos e 177 kg no total olímpico.
Irene Martínez: “Marcho contenta de ter podido chegar”
A deportista manifestaba na súa conta de Instagram que malia o “mal resultado a nivel de marcas, marcho contenta de ter podido chegar, aguantar ben practicamente toda a competición e ter podido gozar doutro Campeonato de Europa”.
Irene Martínez: “Malia o mal resultado a nivel de marcas, marcho contenta de ter podido chegar, aguantar ben practicamente toda a competición e ter podido gozar doutro Campeonato de Europa”.
Mellor sorte tivo Víctor Castro que foi quen de realizar os seus tres intentos válidos tanto en arrancada como en dous tempos. Na súa participación obtivo o 8º lugar en arrancada con 133 kg, 11º en dous tempos con 150 kg, e 11º en total olímpico con 283 kg.
