“Marcho de Madrid” así arranca o texto dunha publicación a través da cal a haltera coruñesa Irene Martínez, máximo exponente da halterofilia galega neste momento xunto coa súa homónima Irene Blanco Tarela (ambas do Club Halterofilia Coruña). A deportista anuncia na súa conta de instagram que logo de trece anos no CAR de Madrid decide mudarse ao CAR de León.
Explica a deportista galega, que hai pouco se proclamaba campioa de España no seu peso, que deixa a que foi a súa “casa durante todos estes anos, donde medrei como persoa e como deportista. Desde os 15 anos, aquí pasei moitos dos mellores momentos e tamén os peores”.
Segundo explica Irene Martínez o motivo podería radicar nunha necesidade de cambio de aires “levo demasiado tempo no mesmo sitio e, logo de cavilalo moito, sinto que preciso un cambio”.
Advirte a haltera galega que esta decisión non é para nada unha “retirada”, máis ben ao contrario. “Marcho por que quero seguir medrando e mellorando como deportista e para conseguir o que quero penso que preciso este cambio”.
Confesa a deportista coruñesa que “antes, deixar a Blume dábame pánico”, pero que “a día de hoxe sinto un pouco de medo pero é normal que tanto tempo logo da mesma vida”. Di Irene Martínez que lle custou “moito tomar esta decisión. Deixo atrás todo o que ten sido a maior parte da miña vida deportiva para empezar de cero unha nova etapa. É un cambio moi grande para min, que non podo negar que me dá algo de vértexe pero que afronto con moitas ganas”.
Ver esta publicación en Instagram
Durante os últimos anos o CAR de León ten sido un Centro de Alto Rendemento de referencia para a halterofilia española, principalmente en categorías de base. Non hai que esquecer que desta terra é Lydia Valentín, a haltera española con maior proxección ata o momento e unha muller que espertou en moitas nenas a curiosidade por esta disciplina.
Como curiosidade, no CAR de León adestra tamén outra galega, a olímpica Belén Toimil, que esta mesma fin de semana se proclamaba por terceira vez campioa de España de lanzamento de peso.
Irene Martínez, vixente campioa de España en 59kg
Este mesmo mes Irene Martínez acadaba o seu 13º título en 14 anos. A galega proclamábase campioa de España na categoría de 59kg. Asinou tres ouros e a mellor marca de todas as categorías levantando 91kg en arrancada (ouro), 101 en dous tempos (prata) e 192 no total olímpico (ouro).
Esta noite, a deportista estará na Coruña recibindo unha homenaxe por parte do Concello da Coruña na Cea do Deporte, unha cita que o consistorio herculina recupera tras sete anos sen celebrarse e no que Irene Martínez é unha das persoas homenaxeadas.
Volve a Cea do Deporte á Coruña con Irene Martínez como unha das homenaxeadas
