O polideportivo municipal da localidade leonesa de Camponaraya acolleu a XVIII Copa de España de Halterofilia femenina e masculina. A campioa olímpica, Lydia Valentín, foi a vencedora dunha proba na que a galega Irene Martínez, que regresaba á competición logo dunha lesión, acadou a sétima praza.
A este evento deportivo poden acudir as 15 mellores levantadoras e os 15 mellores levantadores. En total, os 30 mellores deportistas segundo o ránking nacional da Federación Española de Halterofilia.
No caso galego, catro foron as persoas clasificadas para a cita, dúas mulleres (Irene Martínez e Irene Blanco) e dous homes (Víctor Castro e Martín Liste), todas elas do Club Halterofilia Coruña.
Trátase, polo tanto, dunha das competicións de maior nivel no ámbito estatal. Este ano, a Copa de España foi tamén unha das probas clasificatorias que a dirección técnica da Real Federación Española de Halterofilia vai utilizar para definir o equipo nacional que participará no Campionato de Europa Absoluto de Moscú (Rusia) do próximo mes de abril. Dita selección farase pública nas próximas semanas. O galego Víctor Castro parece ter boas opcións para entrar na selección.
Con so seis semanas de adestramento a coruñesa Irene Martínez presentou batalla nesta importante cita estatal. A galega tivo unha lesión no pulso que lle obligou a pasar por quirófano. Con todo, acadou un meritorio sétimo lugar no seu retorno á competición no alto nivel español.
As cifras de Irene Martínez foron as seguintes: 84 kg. en arrancada, 90 kg. en dous tempos, 174 kg. no total olímpico e unha puntuación Sinclair 237,08.
Lydia Valentín, triunfou entre os seus paisanos que encheron o pavillón
Segundo explican desde a Federación Española de Halterofilia, a localidade berciana de Camponaraya foi testemuña de luxo nunha das edicións da Copa de España con maior afluencia de público que se lembra. Non foi casualidade, xa que, Lydia Valentín, campioa Olímpica, Mundial e Europea e natural de Camponaraya, foi un imán para os seus paisanos, o que provocou que o Pavillón Municipal de Deportes do pobo quedase pequeno, enchéndose as súas 400 prazas.
Lydia Valentín non defraudou aos seus vecinos e, con 224 kg. conseguidos en total olímpico, obtivo unha puntuación Sinclair de 266,81, o que lle permitiu gañar na súa terra natal a XVIII Copa de España.
O podio estivo completado pola madrileña Ana de Gregorio, con 198 kg. en total olímpico e 257,34 puntos Sinclair e moi preto, en terceiro lugar, pola asturiana Olga Mª Fernández, con 251,42 puntos Sinclair obtidos grazas a un total olímpico de 161 kg.
Irene Blanco Tarela renunciu a acudir para preparar mellor o Mundial
A haltera coruñesa, Irene Blanco Tarela, non foi nesta ocasión da partida pese a estar clasificada para a Copa de España por ránking. A deportista do Club Halterofilia Coruña está concentrada na preparación da súa próxima cita internacional. Non quixo interromper o seu adestramento de cara ao Campionato do Mundo Junior que terá lugar en Bucarest.
A galega xa está confirmada pola Federación Española de Halterofilia como a haltera seleccionada para acudir a esta importante cita do calendario internacional que acolle Romanía.
Así foi a actuación dos galegos Víctor Castro e Martín Liste
Entre os halteras galegos masculinos Víctor Castro foi quen de acadar o sexto lugar, mentres que Martín Liste finalizou a competición no posto noveno. O principal favorito, o canario Andrés E. Mata, non tivo unha boa actuación e, debido a unha lesión nun dos seus xeonllos, non puido completar ningún intento en arrancada, o que provocou que quedase eliminado da competición. O seu máximo rival, o andaluz David Sánchez, soubo aproveitar a oportunidade e, grazas á súa xenial competición, obtivo a primeira posición cun total olímpico de 317 kg e unha puntuación Sinclair de 402, 54 kg.
Tal e como informa a RFEH, en segunda posición terminou o asturiano Alberto Fernández, con 397,88 puntos Sinclair, grazas ao 330 kg que sumou en total olímpico. Por último, en terceiro lugar acabou o canario Acorán Hernández, con 295 kg. en total olímpico e 393,00 puntos Sinclair.
