A pioneira Irene González Basanta, unha das primeiras futbolistas galegas, terá unha rúa na Coruña co seu nome. Este xoves, 13 de xaneiro, o Concello aprobou no pleno o procedemento para homenaxear e honrar a esta figura do fútbol galego.
A concelleira de Deportes, Mónica Martínez, definiuna como “unha muller valente, pioneira, unha máis na longa lista de grandes mulleres referentes da cidade”.
Irene González foi porteira, capitá e fundadora do seu propio club, que levaba o seu nome. No 2021 foi a protagonista dun libro que recolle a súa historia, obra dos xornalistas Rubén Ventureira e Juan Luis Rodríguez Cudeiro e con prólogo da alcaldesa Inés Rey. En ‘Irene y las puertas del fútbol. Historia de una pionera’, os autores recuperan os seus pasos no fútbol galego, abrindo as portas ás mulleres futbolistas e deportistas.
