Paso a paso. Así vai conformando Irene Ferreras o Dépor ABANCA que busca de aquí a final de tempada. Será entón cando a clasificación diga se as galegas acadaron ese ansiado ascenso. Mentres, o reto é cholista: partido a partido. A adestradora confía no bloque, no camiño andado e, sobre todo, no que as branquiazuis van camiñar. Tras o triunfo ante o SE AEM do pasado domingo a entrenador deportivista afirmaba en rolda de prensa que o bloque que adestra “Ten moita marxe de mellora”.
As galegas son segundas. Perseguen en solitario ás líderes da Primera Federación FutFem da RFEF, a SD Eibar que rabuñou un empate do fortín de Abegondo (1-1). A vindeira fin de semana non haberá partido. As deportivistas terán que agardar para volver xogar ata a fin de semana do 19-20 de novembro. Daquela o seu rival será o Barcelona B que é sexto. A novena xornada da Primera Federación levará ao Dépor ABANCA a terras catalás.
A adestradora deportivista, Irene Ferreras, na rolda de prensa post-partido, falaba de que nestes primeiros meses á fronte do banco deportivista viu: “crecemento”. Explicaba aos medios a adestradora madrileña que “cando empezas un proxecto, ao principio necesitas resultados para que a xente confíe en ti e poder ter certo crédito en canto ao proceso. Conseguimos dar certa estabilidade a eses resultados, manternos nunha zona que é boa para nós e a partir de aquí temos moitas cousas asimiladas, pouquiño a pouco iremos puíndo detalles. Temos moita marxe de mellora”.
Ferreras está á procura dunha identidade para o Dépor ABANCA que coida que chegará co tempo
Cre a adestradora branquiazul que este primeiro tramo “deunos certa estabilidade, o equipo ten certos trazos reconocibles”. Con todo a entrenadora do Dépor ABANCA, Irene Ferreras, considera que “para crear unha identidade nun equipo necesitas moito tempo, pero iniciando así é moito máis fácil porque se reforza a idea e a cabeza das xogadoras tamén”.
