As Nosas volven ao Estadio ABANCA-Riazor e o club quere que sexa unha festa do fútbol e do deportivismo. Irene Ferreras, adestradora do Dépor ABANCA é consciente da oportunidade que supón xogar no templo herculino: “É un escaparate para que nas xornadas seguintes veña máis xente a Abegondo e por suposto para ver que esa posibilidade de xogar en ABANCA-RIAZOR pódese dar en máis ocasións”, declaraba a adestradora na previa do partido do domingo da Primera Federación contra do Deportivo Alavés Gloriosas.
O Estadio ABANCA-Riazor acolle As Nosas o vindeiro domingo 12 de novembro a partir das 17:00 horas nun partido que será transmitid pola canle de Youtube do RC Deportivo. Na opinión de Irene Ferreras a cita leva aparellada a “responsabilidade de dar unha boa imaxe, de competir ben, de xerar algo dentro dos deportivistas que veñan vernos”.
A preparadora do Dépor ABANCA admite tamén que esta semana de traballo foi “moi especial cando tes a posibilidade de pisar un escenario así, sabendo que vai vir máis xente do habitual do que estamos afeitas”. No entanto, asegura que “o preparamos con normalidade porque son 3 puntos, temos que tentar seguir coa boa dinámica e sobre todo en casa, aínda que cambiemos de escenario, seguir fortes. O equipo sempre tivo moi bos números en casa e queremos seguir facéndoo ben”.
Dépor ABANCA e Deportivo Alavés Gloriosas xa xogaron este ano no Teresa Herrera
A adestradora deportivista Irene Ferreras advirte que o Deportivo Alavés Gloriosas, “a pesar de non ter os mellores resultados neste inicio é un dos candidatos ao ascenso e ímolo a ter difícil”.
Esta non é a primeira vez que Dépor ABANCA e Deportivo Alavés Gloriosas se enfrontan neste curso. Xa no último Trofeo Teresa Herrera deuse este cruce. Daquela o triunfo foi para as galegas que venceron o XI Trofeo Teresa Herrera ao gañar por 2-0 tamén no Estadio ABANCA-Riazor.
Na previa deste novo cruce, Irene Ferreras era cauta. Advertía que este rival “mudou moito” respecto ao pasado mes de agosto cando coincidiron no mesmo escenario en pretempada.
Explicaba a adestradora madrileña que a proposta inicial “é a mesma pero o proceso xa está máis avanzado. É un equipo que ten moito máis claro as cousas que quere propor. Vai tentar tamén quitarnos o balón, ademais é un escenario onde imos poder ver a dous equipos atrevidos e cun fútbol atractivo. Tamén é é positivo nese sentido. E imos tentar impornos a elas. É un equipo que non sumou os mellores resultados, pero que vén facendo as cousas moi ben e que estou convencida de que reverterá a situación. Imos tentar que non sexa este domingo, que se lles alargue un pouquiño máis”.
Considera Irene Ferreras que o feito de “ter o alento da nosa xente detrás, máis do habitual, é un extra de motivación para as futbolistas e para nós”; á vez que pide “xestionar iso ben, gozalo, facer un bo partido, estar centradas no fútbol e no que demandan os momentos do partido. Oxalá que lle podamos dar esa alegría á afección e poder gozala con ela”.
Xogar en Riazor non é un extra de presión
Non ve Irene Ferreras un extra de presión para As Nosas deportivistas por xogar en ABANCA-RIAZOR porque reitera que “somos un equipo esixido desde o día 1. Independentemente de onde xoguemos temos a esixencia e o obxectivo de sumar de 3 en 3. Estamos a tentar adaptarnos ben a calquera tipo de contexto, xa sexa fóra de casa, con menos xente e en campos que nos condicionasen un pouquiño máis”.
Explicaba Ferreras que en Riazor “temos un aliciente moi positivo. Non creo que sexa presión, todo o contrario, que estas futbolistas poidan sentir ese alento detrás e ese escenario só pódenos dar cousas boas. Somos todos humanos e humanas e seguramente teremos un nervio aí diferente, pero estas cousas tamén son as cousas bonitas do deporte, o poder experimentar cousas diferentes”.
Promete “pór todas os 5 sentidos en facer cada unha o seu parte para que as cousas saian ben. E logo xa o fútbol falará, pero a realidade é que as sensacións son moi boas e o equipo está moi ben”, declaraba en rolda de prensa a preparadora do equipo galego.
