Chámase Irene Ferreras e é a primeira muller e dirixir ao primeiro equipo do Dépor ABANCA. Xa traballa co resto do seu equipo na preparación da campaña 2022-23. A nova adestradora do club branquiazul terá como segunda á galega Cris Oreiro. “Intento axudar e esixir a partes iguais”, dixo na súa presentación a preparadora madrileña que tamén se definiu como “unha adestradora intensa” que ve no club galego “a mellor opción para continuar a miña carreira”.
Asegurou que o feito de que “a forma importe” supuxo un dos motivos para decantarse polo club coruñés. Quere que o Dépor ABANCA sexa “Un equipo capaz de impoñerse desde diferentes rexistros, non so desde o xogo posicional. Un equipo amenazante. Que o rival que teñamos diante non teña claro que imos facer polo feito de que dominemos diferentes rexistros. Un intelixente que interprete o que toque en cada momento. Máis aló do estilo de xogo eu fálolles do que es importante, máis nunha tempada coma esta cun obxectivo ambicioso: ter unha mentalidade forte, saber refacerse nas eventualidades do partido, saber que non sempre vai ir rodado sempre, facer o que toca cando toca”.
A traxectoria previa de Irene Ferreras
Irene Ferreras López de Lamela (Fuenlabrada, Madrid, 4 de marzo de 1989) substitúe no cargo de primeira adestradora do Dépor ABANCA a Miguel Llorente. Chega a Galicia logo de ser segunda adestradora do Real Madrid CF. Na campaña 2021-2022 exerceu como axudante de David Aznar primeiro e de Alberto Toril máis tarde. Con anterioridade, Irene Ferreras acumulou experiencia como máxima responsable técnica no Olímpico de Moratalaz (2015-2016), FF La Solana (2016-2017), Rayo Vallecano B (2017-2018), Rayo Vallecano (2018-2019) e Valencia CF (2019-2020). Cos tres primeiros equipos fíxoo na segunda categoría nacional e cos dous últimos na división de honra.
Antes de ser adestradora Irene Ferreras xogou como porteira de equipos como Rayo Vallecano B, Rayo Vallecano, CF Pozuelo de Alarcón e Atlético de Madrid B, equipo no que se viu obrigada a retirarse en 2015, con só 26 anos, por mor dunha lesión nas costas.
A nova técnica branquiazul posou para os medios gráficos no campo principal coa camiseta Galicia Azul acompañado polo Presidente, Antonio Couceiro. Xa na sala de prensa, atendeu ás preguntas dos medios de comunicación.
Preguntada sobre como foi a súa fichaxe polo Dépor ABANCA, apuntou que “foi sinxelo. Desde a primeira entrevista deime conta que era un club diferente, de que se podía axustar un pouco ao que eu son como adestradora. Evidentemente, o fútbol feminino segue sendo pequeno. Teño moita xente coñecida que estaba aquí ou que puido pasar por aquí e todas as referencias foron moi positivas. Por tanto, entendía que era a mellor opción para continuar coa miña carreira”.
O bloque xa empezou o traballo esta semana, de feito agárdanse tamén adestramentos o xoves e venres en dobres sesións (11:00 e 17:00h). O sábado e domingo As Nosas terán descanso. Ao respecto da súa primeira impresión do grupo que preparará este curso 2022-23 na Primera Federación, Ferreras dixo: “Cando chegas a un sitio e empezas unha pretemporada todo é ilusión, todos son ganas, as xogadoras está moi receptivas, queren absorber todo, teñen moito ímpeto. Na primeira sesión notámolo. É o normal cando empezas un proxecto. Eu insístolles moito en que temos que construír un equipo onde podamos manter estas ganas e esta ilusión no día a día”.
O plan de traballo nestes días de arranque teñen como obxectivo a “adaptación. Imos facer sete semanas de pretemporada, máis que dabondo para mesmo tomarnos a licenza de ter unha semana previa como é a presente para ir axustando cousas, observar moito, ir de maneira moi progresiva, tamén ter en conta a adaptación que sofren moitas das xogadoras das incorporacións, que non só é o equipo, é a nova cidade, a nova vivenda, novos hábitos… Todas esas cousas hai que telas en conta tamén”.
A técnica deportivista insistía en que o obxectivo desta primeira semana de traballo en equipo “é a adaptación, que as veteranas nos axuden a todos a aterrar o mellor posible e que pouquiño a pouco vaiámonos atopando nesa normalidade e nese estado óptimo de cada xogadora”.
Un equipo equilibrado con xogadoras polivalentes, así ve Irene Ferreras ao bloque que prepara: “Estou bastante contenta con como está configurado o cadro. É un cadro equilibrado a nivel de posicións, con xogadoras con certa polivalencia. Tamén estas primeiras semanas sérvennos para situarnos e ver en que posicionamento as xogadoras que nos dan esas opcións renden mellor”.
A preparadora madrileña asegura que foi parte da confección da plantilla. “Fun parte activa desa decisión porque se me tivo moi en conta a opinión que tiven respecto delas. Destacaría sen entrar en individualidades que son xogadoras cunhas ganas de crecer na súa carreira deportiva. É moi positivo porque este club ou contexto vailles a ofrecer esa oportunidade. Teñen ambición, ganas. Quizá noutras etapas non tiveron a oportunidade de dar ese salto e aquí váiselles a esixir iso. Estou moi contenta porque cando se respira iso nun equipo as cousas a priori arrancan máis fáciles. Hai que aproveitar esas ganas que teñen para sacarlles todo o mellor que teñen”.
Así quere Irene Ferreras que xogue o Dépor ABANCA
“Quero que sexa un equipo completo. Unha das cousas importantes que me fixo tamén tomar a decisión é que aquí a forma importa. É un equipo ou un club onde sente identificado cunha maneira de xogar combinativa, reconocible”.
Para Irene Ferreras o paso está “en seguir fomentando iso e en quizá complementar con outras cousas que nos poidan dar maior competitividade aos partidos: ser capaz de impoñernos desde diferentes rexistros, non só mediante o xogo posicional; ser un equipo ameazante, que o equipo rival que teñamos diante non teña claro por onde imos atacar ou que imos facer porque dominamos diferentes rexistros (aí é importante o perfil individual das xogadoras e o que poden achegar); e ser un equipo intelixente que interprete o que toca en cada momento, máis aló do estilo de xogo”.
Explica a adestradora que fala ás xogadoras “do que esta temporada creo que é moi importante, ou todas as temporadas, pero máis cando tes un obxectivo ambicioso, que é o ter unha mentalidade forte, saber sobrepoñernos ás situacións do partido, saber que non todo vai ir rodado sempre e facer o que toca cando toca, máis aló de que predomine unha maneira ou outra”.
Cal é o obxectivo do Dépor ABANCA?
“Entendo que cando falamos do Dépor ABANCA. falemos de aspirar ao máximo. Sei onde veño e convivo con iso porque é algo ao que temos que aspirar. Pero as contas ao principio nunca saen”.
Destacaba Irene Ferreras que “hai un novo formato de competición onde nos vai a dar a posibilidade de ter unha liga moi igualada. de poder errar e probablemente seguir tendo opcións. A mensaxe non é partido a partido, como lles digo a elas, é unha mensaxe de día a día e a partir de aí xa veremos onde nos vai colocando a clasificación. Non penso máis aló porque cando fas contas ao principio e posche obxectivos moi ambiciosos se cadra non construímos previamente a capacidade de poder soportar esa presión. Imos fortalecer desde o aspecto mental, traballarnos como equipo, sentirnos fortes no que facemos e xa nos irá dicindo a clasificación onde temos opcións”.
“A min o club deume toda a importancia que se lle pode dar a unha adestradora que chega, desde o primeiro interese que tiveron en min e desde o esforzo que fixeron para que eu estea aquí. Foi unha decisión importante pero sinxela”.
Irene Ferreras insistiu en que chegou ao lugar “onde quería vir, sabía que ía encaixar a miña maneira de ser, a miña maneira de traballar; que se ía a valorar o meu estilo de liderado e a partir de aí construímos un equipo de traballo moi preparado e onde como todos os grupos humanos veremos o que vai pasando no día a día tamén, pero tamén é a miña responsabilidade facer que todo iso funcione”.
Explicaba a adestradora que cando chega a un sitio “non só dedícome a liderar a un equipo ou a un cadro de futbolistas, senón tamén a un staff, a traballar da man cun club, cunha secretaría técnica. É ao que aspiro, a tentar facelo ben para ter á xente do meu lado e para que a idea teña forza e créase nela”.
Así se define Irene Ferreras como adestradora
Consultada en rolda de prensa sobre como se definiría como adestradora, Irene Ferreras explicaba: “Destacaría o moito que me gusta o xogo. Teño riqueza en canto ao entendemento do xogo e podo achegar moito ás xogadoras. Sempre por onde paso garanto que a xogadora aprende e mellora. Teño moito carácter, son unha adestradora intensa. Quizá cos anos funme pausando un pouco en certos momentos para tamén entender en que momentos hai que apertar e en que momentos hai que rebaixar a tensión”.
Nesa autodefinición, a destradora de As Nosas dixo ser “unha persoa próxima. Considero que a proximidade non vai rifada da responsabilidade nin de que che teñan máis ou menos respecto. Entendo que nun clima de traballo positivo todo o mundo pode ter máis capacidade de dar o mellor que non estando nunha situación na que sintamos incómodos. Tento xerar iso desde o meu staff, desde as miñas xogadoras”.
Outra cualidade que salientou foi a “capacidade adaptativa, como debemos de ter todos os adestradores, para sobrepoñernos ás situacións. Cos anos vou gañando experiencia. Agora síntome preparada para asumir unha responsabilidade importante e que me desestabilice o menos posible a nivel persoal. Un adestrador debe coñecerse moito a si mesmo e ter unha boa harmonía interna para poder logo proxectar iso ao teu corpo de traballo. Tento axudar no máximo posible e esixir a partes iguais”.
A nova técnica deportivista estrea equipo e cidade. Preguntouselle precisamente sobre como estaba sendo esa adaptación á Coruña e admitiu que aínda tivera “pouco tempo. Estou recentemente aterrada e aínda adaptándome a casa, a rutinas, ao club… Pero se sonche sincera, a xente que está aquí fíxome a chegada moi sinxela. É un ambiente moi familiar, onde cada necesidade que teño téntanma resolver ao momento. A cidade visiteina de momento pouco, o máis emblemático; pero faláronme moi ben e era unha das cousas tamén que me motivaba a vir”.
Segundo Irene Ferreras “os adestradores temos a oportunidade de, mediante o noso traballo, vivir experiencias persoais. Un obxectivo que eu me poño a nivel persoal é, máis aló de dar o mellor de min mesma no día a día e no factor deportivo, gozar a nivel persoal e que o día que me teña que ir de aquí, que espero que sexa canto máis tarde mellor, dicir ‘ouve, gocei de todo en xeral, non só do traballo, senón tamén da miña vida’. Pouquiño a pouco ir integrándome, coñecendo xente e adaptándome como todos”.
Dará importancia á canteira e ao traballo de Kevin Cabado co B
Entre as preguntas que xurdiron na rolda de prensa estivo o peso que pensaba darlle á canteira. E nese sentido Irene Ferreras declarou ser “unha adestradora formativa”. Sostivo que lle dá “moita importancia ao filial, ás xogadoras do filial, ao adestrador do filial, ao traballo que fai Kevin (Cabado) porque iso a nós permítenos poder ter un día a día de esixencia. Ter 20, 22 fichas do primeiro equipo é complicado pero se temos un filial que nos fornece con diferentes perfís que aos poucos poden ir atopando o seu lugar e tamén afacéndose ao ritmo que demanda o primeiro equipo, xenial. Nese sentido estou moi contenta respecto do cadro”.
Non descarta a preparadora branquiazul novas incorpacións pero está contenta co bloque que ten: “Temos un cadro moi compensado a nivel de posicións. Si que hai posibilidade de facer algunha outra incorporación no caso de que houbese algo moi interesante que nos puidese mellorar o que temos. Pero a día de hoxe, coas xogadoras que están, coas incorporacións que fixemos, temos materia prima suficiente para empezar a construír. E xa o día a día diranos se temos algunha necesidade nalgún posto ou se temos algunha oportunidade de mellorar algo, pero de momento traballamos co que temos e iso é un pouco a idea”.
A importancia da comunión coa afección
Irene Ferreras ten claro que #ANOSAFORZA “é fundamental. O fútbol é para o afeccionado e traballamos para contentarlles a eles”. Explicaba en rolda de prensa que non tivera aínda “contacto directo con ningún afeccionado que espero que os próximos días me vaia familiarizando e vaia coñecendo caras e nomes propios. É certo que en redes sociais as mensaxes de ánimo foron moitísimas. A xente viu con moi bos ollos a miña chegada e eu pois a corresponderlles con traballo”.
“Sei como funciona isto”, declaraba a preparadora. “Sei que hai que facer que séntanse orgullosos, hai que engancharlles para que se divirtan e se imos da man, afección e equipo, imos chegar moito máis lonxe que se non os temos do noso lado. Nese sentido sempre os teño presentes. Fágolle un chamamento para que desde o día 1, se pode ser, estean xa aí, arrimando o ombreiro e as rapazas van dar o do de peito seguro para que queden contentos e orgullosos co que ven”.
